Qaraǵandy oblysynda elektr stantsııalary men jylý jelilerin jóndeýge basa nazar aýdarylady
QARAǴANDY. QazAqparat - Qaraǵandy oblysynda kelesi jylytý maýsymyna daıyndyq júrip jatyr. Bıyl óńirde jylý jáne elektr jelileri men jylý elektr stantsııalaryn jóndeýge basa nazar aýdarylmaq. Sondaı-aq, kópqabatty turǵyn úıler aldaǵy jylytý maýsymyna daıyndalady. Bul rette ótken kúzgi-qysqy kezeńdegi qatelikter men problemalar eskeriletin bolady, dep habarlaıdy QazAqparat tilshisi.
2021 jyly jóndeý jumystaryna 69 mıllıardtan astam teńge bólinedi. Josparda 21,1 mıllıard teńge somasyna 8 energııa kózderinde 26 qazandyq pen 15 týrbınany jóndeý kózdelgen.
«72 qazandyq, 693 avtonomdy jylytý júıesi, 115 km jylý, 3300 km elektr, 310 km sý qubyry jáne káriz jelileri, 7 myńǵa jýyq kóp qabatty turǵyn úı, 1350 áleýmettik nysan daıyndalady», - dep bólisti Ulantaı Úsenov.
Sondaı-aq, ol barlyq stantsııalarmen kómir jetkizýge sharttar jasalǵanyn jáne ony kómir qoımalaryna jetkizý júrip jatqanyn habarlady. Jalpy, aldaǵy kúzgi-qysqy kezeńge 4 mıllıon tonnadan astam kómir jetkiziledi. Bıýdjettik uıymdar men áleýmettik – mádenı turmystyq nysandar úshin 537 myń tonna kómir, turǵyndar úshin 1 152 myń tonna kómir qarastyrylǵan.
«Qazir stantsııalarda jóndeý naýqany bastaldy. Keıbir stantsııalarda negizgi jáne qosalqy jabdyqtarda josparly kúrdeli jóndeýler júrgiziledi», - dedi energetıka jáne TKSh basqarmasynyń basshysy.
