Qaraǵandy oblysynda elektr energııasynyń tarıfi 2,5 mlrd teńgege zańsyz kóterilgen

QARAǴANDY. QazAqparat – Sybaılas jemqorlyqqa qarsy departament mamandarynyń tekserýinen soń, Qaraǵandy oblysynyń 8 qalasy men 6 aýdanynda elektr energııasyna josparlanyp otyrǵan tarıftiń 2,5 mlrd teńgege negizsiz ulǵaıýyna jol berilmedi. Onyń ishinde bıýdjettik uıymdar úshin únemdeý – jylyna 904,5 mln teńge, dep habarlaıdy QazAqparat tilshisi.

Zańsyz áreketter sybaılas jemqorlyqqa qarsy monıtorıng barysynda belgili boldy. Energııamen jabdyqtaýshy 4 uıymnyń tarıfti ishinara negizsiz ulǵaıtýy anyqtaldy. Olar Sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentiniń tekserýi barysynda elektr energııasyn satyp alý jáne jetkizý shyǵyndarynyń ósýin rastaı almady.

«Usynylǵan qujattarda baǵanyń ósýiniń negizgi sebebi bolatyn elektr energııasyn óndirýshide baǵanyń ósýin rastaıtyn shot-faktýralar joq, sondaı-aq elektr energııasyn tasymaldaýǵa josparlanǵan shyǵyndar rastalmaǵan, jabdyqtaý ústemesinde negizdeme men shyǵyndar tabylǵan joq», - dep habarlady departamenttiń baspasóz qyzmeti.

Osylaısha, kelesi energııamen jabdyqtaýshy uıymdardyń tarıfteri tómendetildi:

«QaraǵandyJylýSbyt» JShS Qaraǵandy qalasynda tarıfti 21,47 teńge mólsherinde ornatpaq bolǵan, tekseristen soń – 20,69 teńge bolyp bekitildi.

«Esep aıyrysý servıs ortalyǵy» JShS Abaı men Shahtınsk qalalarynda, Shahan men Buqar jyraý aýdanynda tarıfti 24,08 teńgege kótermek bolǵan, tekseris nátıjesinde – 22,43 teńge bolyp bekitildi.

«Energoýgol XXI» JShS Saran qalasynda 24,03 teńgege kótergen, tekseristen soń – 22,67 teńge bolyp bekitildi.

«Kazenergotsentr» JShS: Balqash qalasynda 26,05 tg – 22,85 tg, Prıozersk qalasynda 19,7 tg – 18,74 tg, Qarqaraly aýdany 27,86 tg – 25,99 tg, Aqtoǵaı aýdany – 20,77 tg – 18,41 tg, Molodejnyı kenti 20,94 tg – 19,49tg.

Sondaı-aq, monıtorıng qorytyndysy boıynsha Balqash qalasynyń 73 myń turǵynyna jylý jáne sýmen jabdyqtaý boıynsha kommýnaldyq qyzmetterge tarıfterdi tómendetý esebinen 200 mln teńgeden astam somaǵa shyǵyndar óteldi.

«Monıtorıng barysynda «Balqash jylý» JShS jáne «Balqash sý» KMK tarıftik smetasynyń oryndalýy jónindegi esepte kommýnıkatsııalardy jóndeýge jáne apparatty joıýǵa arnalǵan shyǵystar qujattamalyq túrde rastalmaǵany anyqtaldy. Nátıjesinde, Balqash qalasynyń tutynýshylaryna jylý boıynsha tarıfter tómendetildi – «Balqash jylý» JShS jylýmen jabdyqtaý boıynsha tarıfter 8,75%-ǵa azaıdy. Sý boıynsha – «Balqash sý» KMK – 10,94%-ǵa, sý burý boıynsha – 16,69%-ǵa tómendedi. Jalpy eseptegende, tarıf 231 mln teńgege tómendedi», - dep tolyqtyrdy vedomstvodan.