Qaraǵandy oblysynda eldi mekenderdi sý basý qaýpi seıildi
QARAǴANDY. QazAqparat - Qaraǵandy oblysynda sý tasqynyna qarsy shtab qalypty rejımdegi jumysyna aýysty. Óńirdegi jaǵdaı turaqtandy, dep habarlaıdy QazAqparat tilshisi.
Óńirdegi ózender men sý qoımalaryndaǵy sý deńgeıi tómendedi. Sý tasqyny kezeńi qaıǵyly oqıǵalarsyz ótti.
«Qaraǵandy oblysynyń TJD-ne, Ulttyq gvardııanyń sarbazdaryna, sý tasqynymen kúresýge kómektesken eriktilerge alǵysymdy bildirgim keledi. Men senbi kúni Tassýat aýylynda boldym. Turǵyndar osy jyly sý tasqynyn esh shyǵynsyz ótkerip, atqarylǵan jumystar úshin alǵystaryn bildirdi. Aýyl shetinde ornalasqan úılerde ádetke salyp ýaıymdap, daıyndalyp, sýdyń kelýin kútti. Sý keldi, alaıda jaman saldary bolmady. Degenmen, biz álsiz jerlerdi kórdik. Biz Sadovoe, Chkalovo, Tassýat jáne basqa eldi mekenderdi nyǵaıtý boıynsha jumysty jalǵastyrýymyz kerek», - dedi Qaraǵandy oblysynyń ákimi Erlan Qoshanov.
Qaraǵandy oblysy TJD aqparaty boıynsha qazir oblystaǵy sý tasqyny jaǵdaıy turaqtandy. Ózenderde sý deńgeıiniń aıtarlyqtaı tómendeýi baıqalady. Negizgi sý qoımalarynda tógindiler qysqardy. Joldarda sý júrý toqtady.
Nura aýdanynyń Tassýat aýylynda TJD jáne ákimdik qyzmetkerleriniń kezekshiligi uıymdastyryldy. Eldi mekende sý basý qaýpi joq.
Sý tasqyny bastalǵannan beri oblys aýmaǵynda 3 512 m qorǵaý úımekteri turǵyzyldy, 49 160 qum salynǵan qap tóseldi, 13 676 tonna ınertti materıal tóseldi, 631015 tekshe metr sý soryldy, tórt sý ótkizgish qubyrlar ornatyldy, uzyndyǵy 2 700 metr aınalma arnalar quryldy.
