Qaraǵandy oblysynda ekologııalyq senbilik ótti
QARAǴANDY. QazAqparat - Qaraǵandylyqtar demalys kúnderi sý qoımalarynyń jaǵalaýynan qoqys jınap, aǵash otyrǵyzdy. Ekologııalyq senbilikter Dúnıejúzilik tazalyq kúnine (World Clean Up day) oraılastyryldy, dep habarlaıdy QazAqparat tilshisi.
Qaraǵandyda aktsııa Fedorov sý qoımasynda ótti. Oǵan eriktiler, ekologııalyq belsendiler, qoǵam qaıratkerleri, kásiporyn qyzmetkerleri men memlekettik qyzmetshiler qatysty. Jaǵalaý aımaǵynda tal egildi.
Oblystyq tabıǵı resýrstar jáne tabıǵat paıdalanýdy retteý basqarmasynyń bastamasymen «Surypta, tapsyr, qaıta óńde!» atty aktsııa uıymdastyryldy. Oǵan qatysýshylar Tıhonovka ormanynda qoqys jınap, ony birden suryptady. Qapqa plastık, shyny, alıýmınıı jáne aralas qaldyqtar bólek salyndy. Sodan keıin munyń bári qaıta óńdeýge jiberildi.
Ekologııalyq senbilikter barlyq qalalar men aýdandarda ótti. Jezqazǵanda Keńgir sý qoımasynyń jaǵalaýy qoqystan tazartyldy.
Aktsııa osy jyly óńirde jarııalanǵan «Keńgir - barshanyń qamqorlyǵy» jobasynyń logıkalyq jalǵasy boldy. Jezqazǵandyqtar ortaq kúsh-jigermen jaǵalaýdy retke keltirip jatyr.
