Qaraǵandy oblysynda eki jyldan soń ólketaný murajaıy joq mektep qalmaıdy
ASTANA. QazAqparat - Qaraǵandy oblysynda 125 mektepte qazirgi tańda ólketaný murajaılary qyzmet etedi, al aldaǵy eki jyl kóleminde olar qalǵan barlyq mektepterde qurylatyn bolady. Ol týraly aımaq basshysy Erlan Qoshanov Ortalyq kommýnıkatsııalar qyzmetinde ótken brıfıngte málimdedi.
«Rýhanı jańǵyrý» baǵdarlamasynyń arqasynda oblystaǵy oqýshylar qasıetti jerlerge ekskýrsııalarǵa shyǵýǵa múmkindik aldy. Sabaqtardyń bir bóligi tarıhı-ólketaný murajaılarynda ótedi. Ótken oqý jyly barysynda ondaı sabaqtarda 100 myńnan astam oqýshylar bolyp qaıtqan, - dep atap ótti Erlan Qoshanov. - Jáne de biz óz týǵan ólkesiniń tarıhymen, kıeli jerlerdiń tarıhymen tanysa otyryp, balalardyń júreginde týǵan jerine degen mahabbaty týyndaıtynyn kórip otyrmyz. Al ol degenimiz - sanany jańǵyrtýdyń basty maqsattarynyń biri».
Ol Elbasynyń «patrıottyqtyń eń jaqsy úlgisi - mektepterde týǵan ólkeńniń tarıhyn oqyp-zertteý» degen sózderin eske saldy.
«Oblysta mektep jandarynda ólketaný murajaılaryn qurý boıynsha jumystar bastaldy. Olar osyǵan deıin de bolǵan, alaıda ol óte sırek kezdesken jaıt edi. Al búgingi kúni oblysymyzdyń 125 mektebinde osyndaı murajaılar ashylǵan. Eki jyldan soń olar aımaǵymyzdyń barlyq mektepterinde jumys isteıtin bolady», - dedi Erlan Qoshanov.
