Qaraǵandy oblysynda eki jańa kompıýterlik tomograf iske qosylady
QARAǴANDY. QazAqparat - Jaqyn arada Qaraǵandy oblysynyń medıtsınalyq mekemelerinde eki jańa kompıýterlik tomograf ornatylady. Bul týraly onlaın rejıminde ótken baspasóz máslıhatynda densaýlyq saqtaý basqarmasynyń basshysy Erjan Nurlybaev málim etti, dep habarlaıdy QazAqparat tilshisi.
Jańadan ornatylatyn kompıýterlik tomograftyń biri 29 maýsymda, kelesi dúısenbiden bastap iske qosylady. Ol Seıfýllın kóshesi, 13 úı mekenjaıynda ornalasqan Maqajanov atyndaǵy Travmotologııa jáne ortopedııa ortalyǵynda ornatylady.
Ekinshisi Shahtınsk qalasynda memlekettik-jekemenshik áriptestik baǵdarlamasy boıynsha satyp alynady.
COVID-19 testileý aýqymyn arttyrý úshin Temirtaýda 1 shildede PTR-zerthanasy ashylady.
«Qazir jedel járdem máselesi ótkir tur. Oblysta JRVI jáne pnevmonııa belgileri bar turǵyndardan kelip túsetin shaqyrýlar sany 20%-ǵa ósti. Kún saıyn feldsherler myńnan astam shaqyrýǵa qyzmet kórsetedi. Jaǵdaıdy retteý úshin biz Temirtaý men Qaraǵandynyń ár emhanasynda 2-3 qosymsha brıgada uıymdastyrdyq», - dedi Erjan Nurlybaev.
Qaraǵandy oblysy densaýlyq saqtaý basqarmasynyń basshysy atap ótkendeı, jaǵdaıdyń ýshyǵýyna kadrlar tapshylyǵy sebep bolyp otyr. Ol barlyq saqtyq sharalaryna qaramastan, dárigerler de aýyratynyn aıtty. Bul máseleni sheshý úshin basqa óńirlerden mamandar jumyldyrylady.
Qaraǵandy oblysynyń turǵyndary jedel járdemnen basqa dárihanalarda vırýsqa qarsy jáne dene ystyǵyn túsiretin preparattardyń jetispeýshiligine shaǵymdanýda.
Oblystyq densaýlyq saqtaý basqarmasynyń basshysy tapshylyq jasandy túrde jasalǵan, dári-dármekter jetkilikti mólsherde qoımalarda bar ekenin málimdedi.
«Adamdar dári-dármekti qajet bolmasa da satyp alady. Mundaı áreketterge barmaýdyń birneshe sebebi bar: birinshiden, dári-dármektiń jaramdylyq merzimi bar; ekinshiden, kez kelgen dári - hımııa. Ony belgilengen ýaqytta jáne qatań túrde qabyldaý kerek, áıtpese adamdar óz densaýlyǵyna zııan keltirýi múmkin», - dep atap ótti Erjan Nurlybaev.
Ol sondaı-aq derttiń aldyn alý úshin vırýsqa qarsy quraldardy qabyldaý tıimsiz ekenin túsindirdi, sebebi mundaı dáriler aǵzadaǵy vırýstarǵa ǵana áser etedi. Eger ol aǵzada bolmasa, onda preparat ony qabyldaıtyn adamǵa zııan keltirýi múmkin.
Sondaı-aq, oblystyń bas dárigeri koronavırýs ınfektsııasymen aýyrǵan naýqastardan plazma alyna bastaǵanyn aıtty. Sońǵy zertteýlerge sáıkes, mundaı plazmany aýyr naýqasqa quıý aýrýdyń barysyn jeńildetýi múmkin.
