Qaraǵandy oblysynda eki ózenniń arnasy tereńdetilip, tazartylady
QARAǴANDY. QazAqparat - Qaraǵandy oblysynda kóktemgi sý tasqynynyń aldyn alý úshin Kókpekti jáne Solonka ózenderiniń arnasy tereńdetilip, tazartylatyn bolady, dep habarlaıdy qazAqparat tilshisi.
Suryptaý shaǵyn aýdany janyndaǵy Jumysshy kenti Qaraǵandydaǵy sý tasqyny qaýpi bar ýchaskelerdiń biri bolyp sanalady.
«Munda 80-ge jýyq jeke úı ornalasqan. Kent janynda eki ózen: Kókpekti jáne Solonka aǵyp jatyr. Sonymen qatar qysta jaýǵan qar da aıtarlyqtaı qalyń. Sonyń saldarynan qaýip odan beter ulǵaıyp otyr», - deıdi mamandar.
Qaýipti ýchaskege Qaraǵandy oblysynyń ákimi baryp, jaǵdaıdy qadaǵalap qaıtty. Jeńis Qasymbek aýdan turǵyndaryn qaýipsizdendirý úshin sý bógetin nyǵaıtýdy tapsyrdy. Qazir sý aǵynynan qorǵaıtyn úıindi basylyp qaldy, sondyqtan ony nyǵaıtý qajet.
2015 jyly Kókpekti bógeti buzylyp, munda úlken sý tasqyny bolǵan. 2016 jyly osyndaı tótenshe jaǵdaıdy boldyrmaý úshin bıýdjetten tys qarajat esebinen uzyndyǵy 1200 metr bóget salyndy. Nátıjesinde 2017 jyly sý basý shamaly boldy. 2018 jáne 2019 jyldary olar múldem bolǵan joq.
Sonymen qatar, kóktemde Solonka ózenin sanatsııalaý jumystary bastalady. Tazartý jáne tereńdetý jumystary ózen arnasynyń 9 shaqyrym uzyndyǵy boıymen júrgiziledi dep josparlanyp otyr. Bul kún jylyǵanda ózenniń arnasynan asýyna jol bermeý úshin jasalyp otyrǵan shara.
