Qaraǵandy oblysynda eki mobıldi kóliktik baqylaý beketi jumys isteı bastady
QARAǴANDY. QazAqparat - Qaraǵandy oblysynyń kólik ınspektsııasynyń avtoparki eki jańa mashınamen tolyqty. Avtokólik satyp alýǵa oblystyq bıýdjetten tıisti qarajat bólindi.
Jyljymaly beketter júk kóp tasymaldanatyn baǵyttardaǵy avtojoldarda jumys isteıtin bolady, dep habarlaıdy QazAqparat.
Mashınalar kóliktik baqylaý júrgizý úshin barlyq qajettiliktermen jabdyqtalǵan. Júk kólik quraldaryn ólsheýge arnalǵan jyljymaly tarazylar men jabdyqtar bar. Baqylaýshylar júk kólikteriniń júktemesi mólsherden tys asyp ketkenin birden anyqtaı alady.
Avtomobıldiń tóbesinde jáne salonynyń ishinde beınekameralar ornatylǵan, olardyń beınesi onlaın rejıminde QR Indýstrııa jáne ınfraqurylymdyq damý mınıstrligi Kólik komıtetiniń ahýaldyq ortalyǵyna beriledi. Kez kelgen adam ınspektorlardyń jumysyn baqylaı alady.
Mobıldi beketter kóliktik baqylaýdy jaqsartýǵa múmkindik beredi. Bul jóndelip jatqan joldardy saqtaý úshin qajet. Búginde oblysta avtotrassalardyń 80%-dan astamy jaqsy jáne qanaǵattanarlyq jaǵdaıda. Bul kórsetkish joǵarylap keledi – joldardy jóndeý aýqymy jyldan jylǵa artyp keledi.
Beketterdiń biri Jezqazǵan óńirinde ornalasatyn bolady. Ekinshi jyljymaly beket Qaraǵandy, Abaı, Buqar Jyraý, Nura, Osakarov, Shet jáne Qarqaraly aýdandarynyń joldarynda jumys isteıdi.
