Qaraǵandy oblysynda eki er adam qutqaryldy
QARAǴANDY. QazAqparat – TJD qyzmetkerleri Qaraǵandy oblysy Botaqara aýylynda eki er adamdy qutqaryp qaldy. Ekeýi de qaıyqpen alysqa júzip ketip, óz betterimen jaǵaǵa orala almaı qalǵan, dep habarlaıdy «QazAqparat» HAA tilshisi.
2019 jylǵy 30 tamyzda saǵat 12:10-da Buqar Jyraý aýdanyndaǵy Botaqara aýylynyń Botaqara kólinde TJD qutqarýshylary qaıyqpen jaǵadan júzip ketip, qaıta almaı qalǵan 1958 jyly týǵan er adamdy qutqardy.
Uqsas jaǵdaı dál osy sý aıdynynda sol kúni saǵat 20:50-de bolǵan. Qutqarýshylar qaıyqpen jaǵadan alysqa júzip ketken 1965 jyly týǵan azamatty qutqaryp aldy.
Qutqarylǵan er adamdar medıtsınalyq kómekti qajet etpedi.
Shomylý maýsymy bastalǵaly beri oblystyń sý qoımalarynda 59 jaǵdaı tirkeldi. 38 adam qutqarylyp, 21 adam sýǵa ketti, olardyń qatarynda 4 bala bar. Qutqarý bólimsheleri 52 súńgý-izdestirý jumystaryn júrgizdi.
Odan bólek oblystyń sý aıdyndarynda adamdardy qorǵaýdyń tıimdiligin arttyrý maqsatynda Qaraǵandy oblysy TJD bólimsheleri 47047 adammen áńgime júrgizip, dáris oqydy. Jergilikti polıtsııa qyzmetimen birlesip, sý qoımalary men apatty jaǵajaılardaǵy jappaı demalý oryndarynda 1300-den astam profılaktıkalyq reıdter men patrýldeý júrgizildi. Oblys boıynsha sý boıyndaǵy demalys oryndarynda 301 tyıym salýshy belgi men 67 kórneki stend ornatylǵan, jaǵajaılarda 18 qutqarý beketi qurylyp, 43 erikti qutqarýshy tartyldy. Sondaı-aq, 10 qoǵamdyq qaýipsizdik beketi men 10 medıtsınalyq beket qoıylǵan.
TJD bólimsheleri 3020 patrýldeý men 1160 reıd ótkizdi. Polıtsııa departamenti qyzmetkerlerimen birlesip, QR ÁQBtK 440 babyna sáıkes, 143 zań buzýshylyq anyqtalyp, 1 mln 805 myń 375 teńgege aıyppul salyndy.
