Qaraǵandy oblysynda egis alqaptarynda zııankesterdi ýlaý jumysy júrgiziledi
QARAǴANDY. QazAqparat – Qaraǵandy oblysynda kóktemgi egis jumystarynyń nátıjesi qorytyndylandy. Egin egý naýqany kásiporyndardyń aldyn ala daıyndalýy men ýaqtyly qarjylandyrýdyń arqasynda der kezinde aıaqtaldy. Agrarııler endigi kezekte jazǵy maýsymdyq jumystarǵa kirise bastady, dep habarlaıdy QazAqparat tilshisi.
«Oblys boıynsha egis jumystary josparlanǵan merzimde aıaqtaldy. Bıylǵy jyly jazdyq egis kólemi 1 mln 1 myń 200 ga qurady, bul 2019 jylǵy deńgeıden 51,1 myń gektarǵa artyq. Ótken jylmen salystyrǵanda dándi jáne dándi-burshaqty daqyldardyń kólemi 32,7 myń gektarǵa artyp, 895,7 myń ga qurady, onyń ishinde arpa - 18,2 myń ga jáne suly - 7,0 myń ga», - dedi aýyl sharýashylyq basqarmasynyń basshysy Saǵynjan Apaqashov onlaın rejıminde ótken apparattyq keńes barysynda.
Oblysta bıyl kartop pen kókónis kóp egildi. Maıly jáne azyqtyq daqyldar egisi de ulǵaıdy. Sharýashylyqtar sondaı-aq surypty jańartýmen aınalysýda. Ol úshin 8 700 tonnadan astam joǵary ónimdi dándi daqyldar tuqymy, 4 300 tonnadan astam kartop tuqymy satyp alyndy. Tańdaýly tuqymdar egistigi keńeıdi.
Basqarma basshysynyń aıtýynsha, aýyl sharýashylyq taýarlaryn óndirýshiler 335 mln teńge kóleminde sýbsıdııa aldy. QazAgro ınstıtýttary arqyly 135 kásiporynǵa kóktemgi dala jumystaryn júrgizýge jalpy somasy 4,2 mlrd.teńgeden astam nesıe berildi. 19 myń tonna jeńildetilgen dızel otyny bólindi.
«Baǵdarlamalar boıynsha sýbsıdııalar tóleý jalǵasýda, onyń ishinde aramshópterge qarsy hımııalyq tazartý jáne ósimdikter aýrýlary men zııankesterge qarsy óńdeý qarastyrylǵan. Aýyl sharýashylyq alqaptary men daqyldardyń egisteri kún saıyn tekserilip otyrady», - dedi Saǵynjan Apaqashov.
Alqaptardy shegirtkege qarsy óńdeý bastaldy. Oǵan respýblıkalyq jáne oblystyq bıýdjetten qarjy bólindi.
Alda basqa da maýsymdyq jumystar bar - kúzgi daqyldar egiletin jerlerdi óńdeý jáne jem-shóp daıyndaý.
Oblys ákimi Jeńis Qasymbek agrarlyq sektorǵa barynsha qoldaý kórsetýdi tapsyrdy.
