Qaraǵandy oblysynda egis alqaby ulǵaıtylady
QARAǴANDY. QazAqparat – Qaraǵandy oblysynda 2022 jyly kóktemgi egis alqaby 1,1 mln gektarǵa egiledi dep josparlanǵan, bul ótken jylmen salystyrǵanda 45 myń gektarǵa artyq. Agrarshylar dándi jáne jem-shóp daqyldaryn, kópjyldyq shópterdi egýdi ulǵaıtady. Sondaı-aq kartop jáne kókónis alqaptary da ulǵaıtylady, dep habarlaıdy QazAqparat tilshisi.
Kóktemgi dala jumystaryna daıyndyq onlaın rejıminde apparattyq keńeste talqylandy.
Aýyl sharýashylyǵy basqarmasynyń basshysy Asqar Sanaýbarovtyń aqparaty boıynsha, bıyl 977,5 myń ga dándi daqyl egý josparlanǵan, kartopqa 11,4 myń ga jer bólingen.
«Ónimdiliktiń artýy tuqym sapasyna baılanysty. Elıta men birinshi kóbeıtilgen tuqymdardy paıdalaný ulǵaıtylatyn bolady. Sonymen qatar, bıyl mıneraldy tyńaıtqyshtardy kóbirek satyp alý josparlanýda. Bul óz kezeginde jerdi utymdy paıdalaný úshin qajet», – dep atap ótti Asqar Sanaýbarov.
Basqarma basshysynyń aıtýynsha, aýyl sharýashylyǵy tehnıkasynyń basym bóligi daıyndaldy. Egis naýqanyna 11 myńnan astam traktor, 351 egis kesheni, 6 078 tuqym sepkish tartylatyn bolady.
Aýyl sharýashylyǵy óndirýshileri arzandatylǵan dızel otynyn alady. Agrarlyq nesıe korporatsııasy arqyly memlekettik qoldaý qarastyrylǵan.
Kóktemgi dala jumystaryna daıyndyq boıynsha oblystyq jedel shtab jumys isteıdi. Oblysta egin egý mamyr aıynyń ekinshi onkúndiginde bastalady dep kútilýde.
«Ýaqytynda qajettiniń bárin qamtamasyz etý, tuqymdardyń sapasyna tekserý júrgizý qajet. Agrotehnologııalardy saqtaý mańyzdy, mıneraldy tyńaıtqyshtardy paıdalanýdy arttyrý, sýarmaly eginshilikti arttyrý qajet. Sharýalardy arzandatylǵan otynmen qamtamasyz etý baqylaýda», – dep qorytyndylady oblys ákimi Jeńis Qasymbek.
