Qaraǵandy oblysynda egin jınaýǵa 2 myńnan astam kombaın jumyldyryldy
QARAǴANDY. QazAqparat - Qaraǵandy oblysynda egin jınaý naýqany júrip jatyr. Egistikterde jumys ádettegiden on kún buryn bastaldy. Jazda jaýyn-shashyn kóp bolmasa da, sharýalar astyqtyń sapasy jaqsy bolady deıdi, dep habarlaıdy QazAqparat tilshisi.
Jeńis Qasymbek Osakarov jáne Nura aýdandaryna jumys sapary barysynda aýyl sharýashylyǵy salasynyń ókilderimen kezdesip, egin jınaý naýqany qalaı júrip jatqanyn, kúrdeli epıdemıologııalyq jaǵdaıǵa baılanysty qandaı kómek qajet ekenin talqylady.
Ónim jınaý maýsymynda oblystyń 33 iri sharýashylyǵy rezervtik qorǵa 36 myń tonna astyq jóneltedi, bul ótken jylǵy kórsetkishten 6 myń tonnaǵa artyq. Ol óz kezeginde kóktemde nan baǵasyn ustap turýǵa múmkindik beredi. Turaqtandyrý qory dástúr boıynsha jergilikti óndirýshilerdiń kókónisterine toly bolady. Oblys fermerleri qoımaǵa 2,5 myń tonna kartop, 400 tonna sábiz, 200 tonna qyryqqabat jóneltedi. Olar óz ónimderimen tek oblysty ǵana qamtyp qoımaı, Almaty, Shymkent jáne Túrkistan oblystaryna da jóneltedi.
«Bıyl mıneraldy tyńaıtqyshtarǵa 760 mln teńge sýbsıdııa bólindi. Bul ótken jylǵy kórsetkishten 2 ese kóp. Nátıjesinde mıneraldy tyńaıtqyshtar kólemi 147 myń gektarǵa artqanyn kórip otyrmyz. Jergilikti bılikten taǵy qandaı kómek qajet, qandaı problemalar bar?» – dep surady Jeńis Qasymbek agrarshylarmen kezdesý barysynda.
Aýyl turǵyndary qazir bir kúndi de bos jibermeı jatqanyn aıtty. Egis alqaptarynda jumys belsendi júrip jatyr. Karantın rejımine qaramastan, aıtarlyqtaı problemalar joq. Agrarııler aýyl sharýashylyǵy tehnıkasyn jańartýda, keıbireýler egis alańyn ulǵaıtýǵa tyrysýda, al jańbyr egindi búldirmeýi úshin búgingi tańda kóptegen adamdar zamanaýı keptirý keshenderin iske qosty. Olar óńirimizdegi aýa-raıy qubylmaly bolǵandyqtan, bul qurylǵylar qajet deıdi.
Mysaly, Osakarov aýdanynda «Jańa Aı» JShS basshysy Vıacheslav Shamordın 5 myń tonna saqtaýǵa arnalǵan zamanaýı keptirý keshenin tanystyrdy.
«Gazgolderler, bý shyǵarǵyshtar ornatyldy. Іske qosý jumystaryn júzege asyryp jatyrmyz. Barlyǵy avtomattandyrylǵan. Bir jolǵy saqtaý 5 myń tonnany quraıdy. Saǵatyna 100 tonna astyq qabyldap, keptire alamyz. Bul qondyrǵyǵa 300 mln teńgeden astam qarajat jumsaldy, biraq biz búgin bul keshenniń bizdi shyǵyndarymyzdyń ornyn jabatynyn bilemiz», - dedi Vıacheslav Shamordın.
Egin jınaýǵa barlyǵy 2 345 astyq jınaıtyn jáne 60 kartop jınaıtyn kombaın jumyldyryldy. Aýyl sharýashylyǵy kásiporyndary arzandatylǵan dızel otynymen qamtamasyz etilgen.
