Qaraǵandy oblysynda egin jınaý naýqany aıaqtalýǵa jaqyn
QARAǴANDY. QazAqparat - Qaraǵandy oblysynyń ákimi Jeńis Qasymbek egin orý jumystarynyń barysymen tanysty. Óńir basshysy Buqar jyraý, Osakarov jáne Nura aýdandarynda bolyp qaıtty, dep habarlaıdy QazAqparat tilshisi.
Buqar jyraý aýdanynda egin jınaý naýqany 72%-ǵa aıaqtaldy.
«Jumys jospary boıynsha biz astyqty 1 qazanǵa deıin jınaýymyz kerek. 6 qazanǵa deıin kartop pen kókónis jınalyp bolýy tıis. Eger jańbyr jaýmasa, barlyǵyn ýaqytynda aıaqtaımyz», - dedi Buqar jyraý aýdanynyń ákimi Shaǵýrashıd Mamalınov.
Bul aýdanda «Nur SH» JShS jáne «Baımyrza Agro 2018» JShS sekildi eki iri sharýa qojalyǵy ornalasqan. Ekinshisi bir jyl buryn ǵana jumys isteı bastady, alaıda úlken nátıjege qol jetkizdi. Kásiporyn kartop pen kókónis ósirýmen aınalysady.
«Bıyl 140 ga kartop ektik. Qoıma keshenin saldyq, qazir ony jylytýmen aınalysýdamyz. Qazan aıynyń sońyna deıin jumysty tolyq aıaqtaýdy josparlap otyrmyz. Onda 4 qoıma ornalasqan, árqaısysy 760 tonnaǵa eseptelgen. Qazirgi ýaqytta qoımalarǵa kartopty júkteımiz, keshen jartylaı toltyryldy», - deıdi «Baımyrza Agro 2018» JShS quryltaıshysy Erjan Nasharov.
Al Osakarov aýdanynda astyq jınaý qyrkúıek aıynyń sońyna deıin aıaqtalady dep josparlanýda. Jalpy egis kólemi 318 myń gektardy quraıdy. 211 myń gektardan astyq jınaldy. Bul jalpy sannyń 66% quraıdy. Atalmysh aýdanda oblys ákimine agrarlyq bıznestegi tsıfrlandyrý elementteri qalaı paıdalanylatyny kórsetildi.
«Ótken jyly pılottyq rejimde biz óz sharýashylyǵymyzda tsıfrlandyrý elementterin iske qostyq. Jáne Qazaqstanda osy saladaǵy kóshbasshylar dep tanyldyq. Joba 500 gektarǵa eseptelgen. Al bıylǵy jyly alań 4 myń gektarǵa deıin ulǵaıtyldy. Árbir 2-3 kún saıyn jerserikterinen sýretter túsiriledi. Kombaınǵa qosylyp, biz ylǵaldylyqty jáne basqa da parametrlerdi baqylaı alamyz. Kombaındar ónimdilik kartasyn salady, bul eń basty element. Ol bolashaq egistiń negizine jatady», - dep túsindirdi «Naıdorovskoe» JShS dırektory Pavel Lýşak.
«Tsıfrlaýǵa kóshýdiń kómegi tıdi me? Áseri bar ma?» – dep surady Jeńis Qasymbek.
«Árıne, kómektesedi jáne nátıje de bar. Mysaly, ótken jyly oblys boıynsha rekordtyq ónim boldy. Bıylǵy jyly mundaı kórsetkishter joq, sebebi jazda 49 kún jańbyr jaýmady. Biraq bul jaǵdaıda da bizdiń kórsetkish oblys boıynsha ortasha kórsetkishten 1,5-2 ese joǵary», - deıdi Pavel Lýşak.
Egin jınaý jumystary Nura aýdanynda da keste boıynsha júrip jatyr.
«13 qyrkúıekten bastap astyqty jınaı bastadyq jáne 21 kún ishinde barlyǵyn jınaýdy josparlap otyrmyz. Al 18 qyrkúıekten bastap kartopty jınaımyz. Eger aýa-raıy qolaıly bolsa, barlyǵyn ýaqytynda aıaqtaımyz», - dep sendirdi Nura aýdanynyń ákimi Aıan Shalmaǵanbetov.
Oblys ákimi egin orý jumystarynyń barysymen tanysqannan keıin qorytyndy jasap, birneshe tapsyrma berdi. Olardyń bir bóligi sýbsıdııalaý máselelerine qatysty boldy.
«Jalpy, barlyǵy jospar boıynsha júrip jatyr. Eń bastysy, aýa-raıy qolaıly bolsa jaqsy bolady. Ónimdilik jaqsy. Biraq sýbsıdııa máselesin sheship, sharýashylyqtarǵa kómektesý kerek. Muny jyl sońyna deıin jasaý qajet», - dedi Jeńis Qasymbek.
