Qaraǵandy oblysynda egin jınaý bastaldy
QARAǴANDY. QazAqparat - Qarqaraly, Nura, Buqar jyraý, Abaı jáne basqa aýdandarda astyq jınaý bastaldy, dep habarlaıdy Qaraǵandy oblysy ákiminiń resmı saıty.
Bıyl barlyǵy 884 myń gektardan astyq jınalady.
«Tamyz aıynyń basynda negizgi astyq egetin aýdandar – Abaı, Buqar jyraý, Osakarov, Nura alqaptaryn qarap shyqtyq. Jıyn-terim jumystaryna daıyndyqpen jáne aýyl sharýashylyq daqyldary egistiginiń jaı-kúıimen tanystyq», - dep málimdedi Aýyl sharýashylyq basqarmasynyń basshysy Saǵynjan Apaqashov. «Dándi daqyldardyń túrlik ónimdiligi jaqsy. Alaıda, shildede jáne tamyzdaǵy qolaısyz ystyq aýa raıy astyqtyń tolysýyna áser etti».
Bıylǵy jyly bıdaı 631 myń gektardan, arpa – 200 gektardan, suly - 16 myń gektar jerden jınalady. Osy jyly maıly daqyldar 24 myń gektar alqapqa egildi. Kartop jınaý 10.4 gektar, basqa kókónis 1,5 myń gektar alqapta ótedi.
Egin jınaý jumystaryna 2 344 astyq jınaıtyn kombaın, 60 kartop jınaıtyn jáne 72 kartop qazatyn kombaın jumyldyrylady.
«Kelesi jyly kartop, qyryqqabat, pııaz jáne sábiz egý alqaptaryn ulǵaıtý qajet. Bizde kókónisterge suranys joǵary, olardy saqtaý múmkindigi bar. Sondaı-aq, kókónis qory qysqy - kóktemgi kezeńde olardyń baǵasynyń ósýin baqylaýǵa múmkindik beredi», - dep tapsyrdy Qaraǵandy oblysynyń ákimi Erlan Qoshanov.
Óńir basshysy sondaı-aq egin jınaý máselesin jeke ózi qadaǵalaıtynyn atap aıtty.
