Qaraǵandy oblysynda egin orý naýqany 1 qyrkúıekte bastalady

QARAǴANDY. QazAqparat – Qaraǵandy oblysynda keıbir ósimdik sharýashylyqtary astyq, kartop jáne kókónis jınaýǵa kiristi. Jappaı naýqan 1 qyrkúıekte bastalady, dep habarlaıdy QazAqparat tilshisi.

Kúzgi dala jumystaryna daıyndyq týraly apparattyq keńeste aýyl sharýashylyǵy basqarmasynyń basshysy Asqar Sanaýbarov baıandady.

Onyń aıtýynsha, jem daıyndaý aıaqtalýda. Qazirdiń ózinde qajetti shóp qorynyń 90%-ǵa jýyǵy bar. Sonymen qatar, pishendeme daıyndaldy.

«Bıyl dándi daqyldardy jınaý alańy 920 myń ga, maıly daqyldar – 58,4 myń ga, kartop – 11 507 ga jáne kókónister – 1 436 ga quraıdy, astyqtyń ortasha ónimdiligi 8,6 ts/ga deńgeıinde kútilýde, barlyq qajetti tehnıka daıyn», – dep habarlady Asqar Sanaýbarov.

Ósimdik ósirýshilerge tyńaıtqyshtardyń, tuqymdardyń, pestıtsıdterdiń qunyn, sýarmaly sýdy jetkizý shyǵyndaryn óteýge 4,8 mlrd teńge sýbsıdııa tólendi. Aýyl sharýashylyǵy kásiporyndary Agrarlyq nesıe korporatsııasy arqyly qarjylaı kómek aldy. Arzandatylǵan baǵamen dızel otyny bólindi.

Dándi daqyldardy jappaı jınaýdy 1–25 qyrkúıek aralyǵynda ótkizý josparlanýda. Kartopty jınaý 30 qyrkúıekke deıin aıaqtalýy tıis.