Qaraǵandy oblysynda dombyranyń qulaǵynda oınaıtyn orys jigiti turady
QARAǴANDY. QazAqparat – Qaraǵandy oblysynyń Saran qalasynda qazaqsha án shyrqap, kópshilikti tánti etip júrgen orys azamaty turady. Vıtalıı Falık qazaq ánin ǵana emes qazaqtyń qolónerin de nasıhattap júr.
Vıtalıı Falıktiń ákesi orys anasy káris. Ózi dombyrany qolyna 15 jasynda alǵan. Sodan beri ulttyq aspaptan bir eli ajyramaǵanyn aıtady. Búginde qazaqtyń qara dombyrasyn serik etken orys jigiti talaı toı-dýmannyń tórinen tabylyp júr.
Vıtalıı Falık Shet aýdany Ortaý aýylynda týyp, ósken. Anasy ony kishkentaıynan týǵan jerin, elin qurmetteýge úıretkenin aıtady.
Ol sonymen qatar qazaqtyń qolónerin de meńgerip, kásibine aınaldyrǵan. Búginde Vıtalıı kórkem eńbek pániniń muǵalimi. Sabaqta kúndelikti turmysqa qajetti zattardy aǵashtan oıyp jasap, ony oıý-órnekpen árleıdi. Dombyra, qobyz tárizdi ulttyq aspaptardy jasaýǵa qara aǵash úıeńki tańdalsa, turmystyq zattardy shaǵyn buıymdardy daıyndaý úshin terekti qoldanǵan durys, deıdi ol.
Birneshe óner boıynda toǵysqan sheber qazir orteke jasap, ony ulttyq aspaptardyń áýenine qosyp júr. Arasynda qolyna qylqalam alyp, sýret salatyny da bar eken. Aıtýynsha, ár týyndynyń óz tarıhy bar.
«Bizdiń mekteptegi balalar sportqa jaqyn. Keıde án aıtyp, dombyra tartamyz degende, «joq, biz qyzdardyń jumysyna aralaspaımyz» deıtin. Sodan bir kúni orteke jasap shyǵardyq. Ony dombyra shertip, sekirtip oınap kórip edi, ulttyq aspapty qolyna ustap kórmegen balalardyń ózi qyzyǵyp, dombyra úıirmesine bara bastady», - deıdi Vıtalıı.
Vıtalıı Falıktiń balalary qazaq mektebinde oqıdy. Onyń otbasyndaǵylar qazaqtyń salt- dástúri men jón-joralǵysyn berik ustanady eken. Ol kezinde eki balasymen kelgen jalǵyzbasty anasyn baýyryna basyp, qoldaýyn aıamaǵan Ortaý aýylynyń turǵyndaryn qatty qurmetteıdi. Búginde ózi de jerlesterine qoldan kelgen kómegin kórsetip, tatý-tátti ǵumyr keship keledi.
