Qaraǵandy oblysynda demalys kúnderi 18 jol-kólik oqıǵasy boldy
QARAǴANDY. QazAqparat – Aýa raıynyń kúrt ózgerýi, sondaı-aq kólik júrgizýshileriniń jyldamdyqty shekten tys asyrý saldarynan demalys kúnderi Qaraǵandy oblysynyń aýmaǵynan ótetin respýblıkalyq jáne oblystyq mańyzy bar avtojoldar men Qaraǵandy qalasynyń ózinde18 jol-kólik oqıǵasy boldy. Apat saldarynan úsh adam jaraqat aldy, dep habarlaıdy QazAqparat tilshisi.
7 aqpan kúni Osakarov aýdanynda «Osakarov-Qaraǵandy» tas jolynda Batpaq eldimekeninen 2 shaqyrym jerde joldyń kórinbeýinen 31 jastaǵy Mersedes avtokóliginiń júrgizýshisi jol shetindegi qarǵa soǵylǵan. Osydan keıin atalǵan kólikke artynsha úsh kólik soqtyǵysqan. Jol kólik oqıǵasynyń saldarynan jábirlenýshiler men qaıtys bolǵandar joq.
Sondaı-aq, 7 aqpan kúni «Qaraǵandy-Esengeldi» tas jolynda 32 jastaǵy Mersedes-Bents avtokóliginiń júrgizýshisi aýa raıynyń qolaısyzdyǵynan kólikke ıe bola almaı qalyp, Toıota-Kamrı avtokóligimen soqtyǵysqan. Jol-kólik oqıǵasynyń saldarynan Toıota-Kamrı avtokóliginiń jolaýshysy jaraqat aldy.
Dál osy kúni Qaraǵandy qalasynda 25 jastaǵy Dýnfen qoǵamdyq kóliginiń júrgizýshisi Buqar-Jyraý dańǵylynda ara qashyqtyqty saqtamaı, aldynda kele jatqan MAN avtobýsymen soqtyǵysqan. Jol-kólik oqıǵasynyń saldarynan Dýnfen qoǵamdyq kóliginiń 23 jasar jolaýshysyna alǵashqy medıtsınalyq kómek kórsetildi.
Qaraǵandy oblysy Polıtsııa departamenti aýa raıynyń kúrt ózgerýine baılanysty kólik júrgizýshilerden jol júrý erejelerin qatań saqtaýdy, jyldamdyqty shekten tys asyrmaýdy suraıdy. Sondaı-aq, múmkindiginshe alys joldarǵa shyqpaýǵa keńes beredi.
