Qaraǵandy oblysynda dástúrli Jezkiik festıvali ótedi
QARAǴANDY. QazAqparat - 24 tamyzda Qaraǵandy oblysynyń Ulytaý aýdanynda etnomádenı muralardyń Jezkiik ekinshi halyqaralyq festıvali ótedi, dep habarlaıdy QazAqparat Qaraǵandy oblysy ákimdiginiń baspasóz qyzmetine sńlteme jasap.
Aýdandyq Mádenıet, muraǵattar jáne qujattama basqarmasynyń bastyǵy Erkebulan Aǵymbaevtyń aıtýynsha, festıval 2018 jyldan beri dástúrli túrde uıymdastyrylyp keledi. Bıyl onyń aıasynda gastronomııalyq shoý ótedi. Onda shoýdyń bas aspazy qazaqtyń ulttyq taǵamdaryn daıyndap, kóshpendilerdiń dástúrli taǵamdarynyń shyǵý tarıhy týraly áńgimeleıdi.
Bolatsaı aýmaǵynda etnoaýyl salynady. Baǵdarlamanyń negizgi bóligi mýzykalyq aımaqta ótedi. Sporttyq aımaqta Nomad Stunts shabandoz-kaskaderler toby óner kórsetedi. Food-aımaqta qonaqtar tamaqtanyp, salqyn sýsyndar satyp ala alady.
«Jezkıik» ekinshi mýzykalyq festıvalinde Italııa, Ispanııa, Vengrııa, Serbııa jáne Qazaqstan mýzykanttary men folklorlyq ujymdary óner kórsetedi. Sahnaǵa Q. Baıjanov atyndaǵy kontserttik birlestiktiń jetekshi solısteri shyǵady, «Toqyraýyn tolqyndary» halyq án jáne bı ansambliniń ártisteri, halyq ánderiniń oryndaýshylary qatysady.
Gala-kontsertke «Arlan» ulttyq dástúr teatrynyń ártisteri, qazaqstandyq estrada juldyzdary: Qaraqat Ábildına men Qydyráli Bolmanov, aty ańyzǵa aınalǵan «Dos Muqasan» toby, «Ulytaý» jáne Alatau Serileri toptary, «Altyn batyr» step-toby óner kórsetedi.
Festıval qarsańynda 22 tamyzda Ulytaý qalasynda týroperatorlar forýmy ótedi. Oǵan Reseı, Túrkııa, Germanııa jáne basqa da elderdiń mamandary shaqyryldy. Týroperatorlar úshin Joshy han, Alasha han kesenelerine jáne basqa da tarıhı eskertkishter men kıeli jerlerge ekskýrsııa ótkiziledi.
23 tamyzda munda aýyl jastarynyń forýmy ótedi.
Festıval alańynda kıiz úıler ornatyla bastady, jalpy sany 45
kıiz úı kóterilmek. Qazirgi tańda úlken sahnany, oıyn alańdaryn, altybaqandy,
saýda shatyrlaryn, qolónershilerge arnalǵan shatyrlardy jáne basqa da ǵımarattardy
qamtıtyn etnoaýyl qurylyp jatyr.
Birinshi Halyqaralyq Jezkiik festıvali Qaraǵandy oblysynda 2018 jyly ótken bolatyn. Sodan keıin mýzykalyq is-shara jyl saıyn ótkiziledi degen sheshim qabyldanǵan.
