Qaraǵandy oblysynda daryndy egiz balalar arasynda baıqaý ótti
Jańaarqa mádenıet úıiniń balalar men jasóspirimder bóliminiń meńgerýshisi Aıman Aıtjanova osyndaı baıqaýdy úshinshi ret ótkizip otyr.
«Men balalardy jaqsy kóremin jáne olardy shyǵarmashylyq jáne paıdaly qyzmetke tartýǵa tyrysamyn. Bizdiń aýdanda egizder kóp. Birde maǵan osyndaı baıqaý uıymdastyrý ıdeıasy keldi, sebebi egizder, ádette, óte daryndy bolyp keledi. Buryn baıqaý aýqymdyraq ótetin. Bıylǵy jyly pandemııaǵa baılanysty biz birshama shekteýimiz kerek boldy, biraq soǵan qaramastan barlyǵy oıdaǵydaı ótti. Balalar ózin-ózi tanystyrý, shyǵarmashylyq qoıylym jáne defıle kezinde ózindik ereksheligi úshin baǵalandy», – dep esepteıdi Aıman Aıtjanova.
Jańaarqa aýdanynyń ár aýyldarynan kelgen segiz jup baıqaýǵa tyńǵylyqty daıyndaldy.
Ádilqazylar alqasynyń kóńilin Yntymaq aýylynan kelgen 6 jasar Іnjý men Marjan Amanqan jaýlap aldy.
Olar «Qýyrshaq» bıimen óner kórsetip, baıqaýdyń Gran-prıin jeńip aldy.
«Meniń qyzdarym mektepaldy daıarlyq synybynda oqıdy. Olar qoıylym aldynda qatty ýaıymdap, tyńǵylyqty daıyndaldy. Men saıys uıymdastyrýshysyna balalar óz talanttaryn asha alatyn is-sharalar uıymdastyrǵany úshin rızashylyǵymdy bildiremin. Qyzdarym kelbeti jaǵynan da, tabıǵaty boıynsha da ártúrli. Bireýi shıraq, ekinshisi jýastaý. Bireýi aqquba, ekinshisi qaratory. Bul baıqaýda olar bir-birimen úılesimdi boldy», – dedi qyzdardyń anasy Aınur Jaqypbekova.
Sondaı-aq, bas júldeni Qaraǵash aýyldyq okrýginiń Yntaly aýylynan kelgen 9 jasar Nurahmet pen Nurjamal Jaqsybaevtar, jańaarqalyq 11 jasar Arýjan men Aıajan Tóleý ıelendi.
Talanttar baıqaýynda birinshi oryndy M.Jumajanov aýylynan kelgen 9 jasar Nuraı men Araı Saparovalar, 6 jasar Mádı men Ǵanı Nurıden, sondaı-aq jańaarqadalyq 5 jasar Aıym men Aısha Nurbolqyzy jáne Túgisken aýylynan kelgen 11 jasar Bekarys pen Beıbarys bólisti.
Ekinshi oryndy Jańaarqa týmasy 12 jasar Perızat pen Pakızat Jaqsylyq jeńip aldy.
«Qazylar alqasy qatysýshylardy úsh jas sanaty boıynsha baǵalady. Eshkimdi renjitkimiz kelmedi. Balalardyń bári daryndy. Bolashaqta bul baıqaýdy óńirlik deńgeıde ótkizýdi josparlap otyrmyz», – dedi Aıman Aıtjanova.
