Qaraǵandy oblysynda dárigerlerdiń qyzmetine shaǵymdanýshylar 25% azaıdy
QARAǴANDY. QazAqparat - Qaraǵandy oblysynyń Densaýlyq saqtaý basqarmasynyń Call-ortalyǵyna jarty jylda 4500-den astam qońyraý tústi, dep habarlaıdy QazAqparat tilshisi Qaraǵandy oblystyq densaýlyq saqtaý basqarmasynyń baspasóz qyzmetine silteme jasaı otyryp.
Óńirdiń densaýlyq saqtaý basqarmasynda medıtsınalyq «jedel jeli» jumysynyń qorytyndysy shyǵaryldy. Jyl basynan beri Call-ortalyqqa 4693 adam habarlasqan. Turǵyndardan kelip túsken qońyraýlardyń kóbi anyqtamalyq aqparattarǵa qatysty, olar - 3237.
«Bizdiń mamandarǵa kóbine adamdar medıtsınalyq uıymnyń telefonyn bilýge, qandaı da bir máselemen qaı dárigerge barý kerektigin nemese «portalǵa turý úshin» qandaı qujattar jınaý kerek ekenin bilý úshin habarlasady»,- deıdi Call-ortalyqtyń jetekshisi Tatıana Korosteleva.
Ótken jylmen salystyrǵanda dárigerler men medıtsınalyq uıymdarǵa shaǵymdar sany 25% tómendegen. Alaıda, adamdardyń áli de mamandarǵa jazylý men aýrýhanaǵa jatqyzý erejelerine kóńilderi tolmaıdy. Bul suraqtardy Call-ortalyq operatorlary «osy jerde jáne qazir» ádisi boıynsha sheshedi. Naýqastan nemese onyń týysynan qońyraý tússe, «jedel jeli» mamany birden medıtsınalyq uıymǵa habarlasyp, týyndaǵan barlyq máselelerdi sheshedi. Birneshe kúnnen soń operator qajetti kómek kórsetildi me jáne naýqastyń oǵan kóńili toldy ma, osy máselelerdi bilý úshin medıtsınalyq uıymǵa «sheshýshi qońyraý» shalady.
Eske sala keteıik, Densaýlyq saqtaý basqarmasynyń Call-ortalyǵy (tel.: 9-5555-9) 2014-shi jyldyń qyrkúıeginen bastap jumys isteıdi. Shtatta kásibı psıhologııalyq bilimi bar 3 maman bar. «Jedel jelige» qońyraýlar jumys kúnderi saǵat 9.00 men 18.00 deıin qabyldanady. Basqa kúnderi habarlama qaldyrýǵa bolatyn avtojaýap bergish jumys isteıdi.
