Qaraǵandy oblysynda dári-dármektiń úsh aılyq qory bar

QARAǴANDY. QazAqparat - Qaraǵandy oblysynda koronavırýs ınfektsııanyń yqtımal ekinshi tolqynyna daıyndyq kezeńinde dári-dármek qory qamtamasyz etilip, emhanalar men aýrýhanalardy jabdyqtaý kúsheıtildi. Bul týraly óńir basshysy Jeńis Qasymbek Saryarqa telearnasynda ótken brıfıngte aıtty, dep habarlaıdy QazAqparat tilshisi.

«Aýrýhanalar, emhanalar men dárihanalar úshin qajetti dári-dármek qoryn tolyqtyrdyq. «Farmatsııa» SK-men preparattardyń qosymsha kólemine ótinimder jasaldy. Qazir dári-dármek qory úsh aılyq normany quraıdy. Onyń ishinde dıspanserlik esepte turǵan barlyq patsıentter qajetti dári-dármek qoryn qańtar aıyn qosqanda úsh aıǵa alady», - dep habarlady óńir basshysy.

Dárihanalarda satý úshin qosymsha qoljetimdi baǵamen «Azıtromıtsın», «Deksametazon», «Ibýprofen», «Levofloksatsın», «Nadroparın», «Rıvaroksaban», «Tseftrıakson» sııaqty preparattar satyp alynady. Bul syrqattanýshylyq maýsymy joǵarylaǵan kezde dári-dármek tapshylyǵyna jol bermeýge múmkindik beredi.

Sondaı-aq, oblysta 1 mlrd teńgege dári-dármekterdiń turaqtandyrý qory quryldy. 80 myń paket vırýsqa qarsy preparattar, 1 100 myń paket ystyqty túsiretin, 200 myń paket bakterııaǵa qarsy preparattar satyp alyndy. Dári-dármektiń bul kólemi bólshek dárihana jelisinde satýǵa arnalǵan.

Jeńis Qasymbek aýrýhanalarǵa qandaı jańa jabdyqtar berilgeni týraly da aıtyp berdi. 223 ÓJJ apparaty, 2 500 ottegi kontsentratory, 2 600 pýlsoksımetr, 40 sandyq rentgen apparattary satyp alyndy. 25 gospıtalde ortalyqtandyrylǵan medıtsınalyq gaz berý júıesi ornatylǵan.

Oblysta 18 kompıýterlik tomografııa kabıneti jumys isteıdi. Taǵy 4 kompıýterlik tomograf Shahtınsk, Balqash, Jezqazǵan, Sátbaev qalalarynda ornatylǵan.

Kadr máselesine de kóp kóńil bólinedi, dep atap ótti oblys ákimi. Óńirlerge jumys isteýge kelgen medıtsına qyzmetkerlerine qyzmettik turǵyn úı beriledi. Bıyl 120 páter qamtamasyz etilse, kelesi jyly taǵy 400 páter daıyn bolady.

Aımaq basshysy azamattyq jaýapkershiliksiz vırýsty jeńý qıyn ekendigin aıtty.

«Mindetti túrde betperde kıip, áleýmettik ara qashyqtyqty saqtap júrińizder. Bul sizderdiń densaýlyqtaryńyz ben ómirlerińizdi saqtaýdyń mańyzdy ádisteriniń biri», - dedi Jeńis Qasymbek qaraǵandylyqtarǵa qarata aıtqan sózinde.