Qaraǵandy oblysynda dalada adasyp júrgen 5 jasar qyz qutqaryldy
QARAǴANDY. QazAqparat - Buqar jyraý aýdanynda polıtseıler en dalada adasyp júrgen 5 jasar qyzdy taýyp aldy. Denesin sýyq shalǵan qyzdy olar aýrýhanaǵa jetkizdi, dep habarlaıdy «QazAqparat» HAA tilshisi.
Baıqadam aýylyndaǵy orta mekteptiń daıarlyq synybynyń bes jasar oqýshysy 16:30-da mektepten shyqqan jáne ushty-kúıli joǵalǵan.
«Balany izdeýge Buqar jyraý aýdany ІІB barlyq jeke quramy jumyldyryldy. Bes izdeý toby quryldy. Іzdestirý sharalary barysynda polıtsııa qyzmetkerleri búldirshindi túngi 11 jarymda eldi mekennen bes shaqyrym jerden tapty. Balanyń adasyp ketkeni anyqtaldy. Polıtsııa qyzmetkerleriniń jedel áreket etýiniń arqasynda qaıǵyly oqıǵanyń aldyn aldy», - dep habarlady Qaraǵandy oblysy ІІD baspasóz qyzmetiniń jetekshisi Baqytjan Qudııarov. Jalpy aǵzasy sýyqtaǵan qyz aýdandyq aýrýhanaǵa jetkizildi.
