Qaraǵandy oblysynda COVID-19 juqtyrǵan aýyr naýqastar kóbeıdi
QARAǴANDY. QazAqparat – Qaraǵandy oblysynda ınfektsııalyq naýqastarǵa arnalǵan tósek-orynnyń 50%-dan astamy bos emes. Jansaqtaý bólimshelerinde 163 aýyr naýqas bar, olardyń 45-i ÓJJ apparatyna qosylǵan. Bul týraly Qaraǵandy oblysy Densaýlyq saqtaý basqarmasynyń basshysy Gamal Toqsambaev málimdedi, dep habarlaıdy QazAqparat tilshisi.
Qaraǵandy oblysy Densaýlyq saqtaý basqarmasynyń basshysy Gamal Toqsambaev Sovid-19 juqtyrǵan aýyr naýqastardyń kóbeıýine ne sebep bolǵanyn aıtty.
«Ókinishke oraı, sońǵy ýaqytta bizde aýyr naýqastardyń juqpaly aýrýlar aýrýhanalaryna túsýi jıilep ketti. Yqtımal qarym-qatynasty anyqtaý kezinde naýqastar Býrabaı, Baıanaýyl, Balqash sııaqty jerlerden demalystan oralǵanyn nemese túrli merekelerge barǵanyn kórsetedi. Sondaı-aq álsizdik sezinip, uzaq ýaqyt boıy medıtsınalyq kómekke júginbeıdi. Aýrýhanaǵa tynys alý jetkiliksizdigi, álsizdik, aıqyn ıntoksıkatsııa órshigen kúıde kelip túsedi», – dedi Gamal Toqsambaev Óńirlik kommýnıkatsııalar qyzmeti platformasynda ótken brıfıngide.
Spıkerdiń aqparaty boıynsha, oblysta qazir ınfektsııalyq tósekterdiń 52,7%-y bos emes. Statsıonarlarda koronavırýspen aýyratyn 3 myńǵa jýyq naýqas emdelip jatyr. Jansaqtaý bólimshelerinde 163 aýyr naýqas bar, olardyń 45-i ÓJJ apparatyna qosylǵan.
Qaraǵandyda medıtsınalyq kómek kórsetý úshin 380 tósek orny ashyldy. Qala boıynsha 2 971 tósek-orynǵa deıin ulǵaıtyldy, onyń 58%-y qazir jumys isteıdi.
Basqarma basshysy jedel járdem brıgadalarynyń sany artqanyn atap ótti.
«Qazir jedel medıtsınalyq kómekti 105 brıgada kórsetýde. Aýrýshańdyq ósken jaǵdaıda taǵy 20 brıgadany jelige shyǵara alamyz», – dedi Gamal Toqsambaev.
Ol qaraǵandylyqtardy vırýstyq ınfektsııanyń alǵashqy belgileri kezinde medıtsınalyq kómekke júginýge jáne ózin-ózi emdeýmen aınalyspaýǵa shaqyrdy. Vedomstvo basshysy koronavırýspen kúresýdiń negizgi ádisi - vaktsınatsııa ekenin taǵy da eske saldy.
Qaraǵandy oblysynda pandemııa bastalǵannan beri 70 myńǵa jýyq KVI aýrýy tirkeldi, onyń 79%-y jazylyp ketti. Epıdjaǵdaı kúrdeli bolyp otyr – ár táýlik saıyn ınfektsııa juqtyrǵandar myńǵa jetse, keıde tipti odan da asyp ketip jatyr.
