Qaraǵandy oblysynda burynǵy áskerı prokýrorǵa 3,2 mln teńge aıyppul salyndy
Osy jyldyń 24 sáýirinde Qaraǵandy garnızonynyń Áskerı sotynyń sýdıasy Esen Jumabek Prıozersk garnızony Áskerı prokýratýrasynyń burynǵy aǵa prokýrory Anvar Radjapovqa qatysty sot sheshimin shyǵarǵan.
«Ol kináli dep tanylǵan bap «Sybaılas jemqorlyqqa deldal bolý» - ortasha aýyr dárejeli, QR Qylmystyq kodeksiniń 368-baby 1-bóligimen saralanatyn qylmys. Sot ony kináli dep tapty», - dedi Qaraǵandy garnızony Áskerı sotynyń tóraǵasy Aıdar Isabekov agenttik tilshisine.
Onyń aıtýynsha, sottalýshy sot óndirisi barysynda aıypty moıyndaý týraly prokýrormen protsessýaldyq kelisimge kelgen.
«Protsessýaldyq kelisim boıynsha ol aıyppul salý túrindegi jazaǵa kelisti. Prokýror bunymen kelisip, osy kelisim negizinde is sotqa kelip tústi. 24 sáýir kúni is qaralyp, ol kináli dep tanyldy», - deıdi Aıdar Isabekov.
Aıyppul paranyń on eselengen somasy boıynsha belgilengen.
«Onyń alǵan parasy 1000 dollar edi. Teńgege shaqqanda aıyppul 3 273 200 teńge bolyp shyqty. Sonymen birge, ol ómir boıy memlekettik qyzmette eńbek etý quqyǵynan, «kapıtan» áskerı sheninen aıyryldy», - deıdi Aıdar Isabekov.
Anvar Radjapov jemqorlyqqa deldal bolǵany úshin kináli dep tanylyp, sottalǵan Qaraǵandy oblysynyń burynǵy prokýrory Erjan Turysbekovtyń isi boıynsha sotqa tartylǵan edi.
Eske sala ketsek, budan buryn Qaraǵandy oblysynyń Prıozersk qalalyq soty Qaraǵandy oblysynyń burynǵy prokýrory Erjan Turysbekovke qatysty úkim shyǵarǵan bolatyn.