Qaraǵandy oblysynda Buqar jyraýdyń 350 jyldyǵy keń kólemde atalyp ótilýde

Merekelik is-sharany Sáken Seıfýllın atyndaǵy Qazaq dramalyq teatrynyń ujymy sahnalaǵan «Kómekeı áýlıe» qoıylymy ashty. Kórermender XVIII ǵasyrdaǵy Abylaı hannyń keńesshilerimen kezdesý ótkizgen sáttiń tarıhı kartınasyn tamashalaýǵa múmkindik aldy.

Qaraǵandy oblysynyń ákimi Erlan Qoshanov uly jyraýdyń murasy áli kúnge urpaqtan urpaqqa kele jatqanyn erekshe aıtyp ketti.

«Búgin bizdiń uly babamyzdyń armandary oryndaldy. Biz táýelsizdikke qol jetkizdik, shekaramyzdy anyqtadyq, bul is jaqynda ǵana Aqtaý qalasynda túıindeldi.  Munyń barlyǵyn kezinde Buqar jyraý armandaǵan. Handardyń zamanynda parlamenttiń, syrtqy saıasat mınıstrliginiń jumystaryn atqardy. Uly oıshyldyń tarıhı beınesin bizge XIX ǵasyrda Shoqan Ýálıhanov, XX ǵasyrda Muhtar Maǵaýın tanytty. Buqar jyraýdyń eldiń damýyna qosqan úlesin jan-jaqty zerttep, jas urpaqqa jetkizý mańyzdy», - dedi E. Qoshanov.

Merekelik kontserttik baǵdarlamada Roza Rymbaeva, Altynaı Jorabaeva, Jamılıa Baspaqova syndy qazaqstandyq jáne sheteldik estrada juldyzdary, «Haırýllo Dadoboev» folklorlyq ansambli, (Tájikstan), «Aǵaıyndy Júginisovter» toby, Táttimbet atyndaǵy qazaq halyq aspaptarynyń akademııalyq orkestri, sondaı-aq Q. Baıjanov atyndaǵy kontserttik birlestiktiń solısteri óner kórsetti. 

Sharaǵa 10 myńnan astam adam jınalyp, 100-den astam kıiz úı tigildi. Sondaı-aq, arnaıy sporttyq alańdar ázirlendi. 

Jezqazǵanda Buqar jyraýdyń 350 jyldyǵyna oraı uly oıshyldyń shyǵarmashylyǵyna arnalǵan oblystyq konferentsııa uıymdastyryldy. Sáýirde aýdan turǵyndary men jastar arasynda mánerlep oqýdan «Buqarekeń jyrlaıdy» atty XI Aýdandyq baıqaý ótti.

Budan bólek, mamyr aıynda I Halyqaralyq jyrshylar men jyraýlar festıvali ótken edi.

Maýsymda Almaty qalasynyń D. Qonaev atyndaǵy Eýrazııa zań akademııasynyń quqyq jáne keden isi kafedrasynyń meńgerýshisi Qabdýlsamıh Aıtqojınniń qatysýymen «Kómeıinen jyr tamǵan Buqar jyraý» ádebı-poetıkalyq keshi ótti.

Shilde aıynda «Darhan dalanyń uly jyraýy» jastar forýmy ótip, 1 mıllıon teńgeden 10 grant bólindi. Sondaı-aq, qoldanbaly jáne beıneleý ónerinen  «Rýhanııat» kórme-baıqaýy ótkizilgen edi. Sharada «17-18 ǵasyrdaǵy Qazaq handyǵy» taqyrybynda kartınalar nazarǵa usynyldy.

Eske salaıyq, Buqar jyraýdyń rýhanı murasyn dáripteý maqsatynda Buqar jyraý aýdanyndaǵy Dalba taýynyń baýraıynda belgili rejısserlerdiń qatysýymen derekti fılm túsirilgen edi. Atalmysh fılmniń tusaýkeseri qyrkúıek aıynda ótedi.

Aıta ketý kerek, Buqar jyraý aýdany uly oıshyldyń esimimen atalǵan respýblıkadaǵy jalǵyz óńir.