Qaraǵandy oblysynda Buqar jyraý týraly fılm túsirilmek
QARAǴANDY. QazAqparat - Qaraǵandy oblysynda Buqar jyraýdyń týǵanyna 350 jyl tolýyna oraı «Kómekeı áýlıe» atty derekti-kórkem fılm túsiriledi, dep habarlaıdy QazAqparat tilshisi.
«Buqar jyraý týraly kartına oblys ákiminiń qoldaýymen túsiriledi. Fılmniń alǵashqy túsirilimderi osy jyldyń 6 maýsymynda Buqar jyraý aýdanynda bastalady. Ol jerde Buqar jyraý kesenesi bar. Biz Buqar jyraýdyń búkil ómirin qamtıtyn 50 mınýttyq derekti-kórkem fılmdi daıyndap jatyrmyz», - deıdi fılmniń prodıýsseri Jánibek Sadyqanov.
Týyndy 10 epızodtan turady. Stsenarıı avtory jýrnalıst Áshimhan Jampeıisov pen tarıh ǵylymdarynyń doktory, professor Jambyl Artyqbaev. Kartınanyń jetekshisi qaraǵandylyq rejısser Qarshyǵa Igenov. Fılmniń sıýjeti Buqar jyraýdyń shynaıy ómiri men Qazaq handyǵynyń on segizinshi ǵasyryndaǵy ómirin qamtıtyn bolady.
«Fılm tolyǵymen tarıhı faktilerden turady. Álbette, kórkemdik paıymǵa da oryn tabylady. Biraq, bizdiń basty maqsatymyz - sapaly fılmdi daıyndap shyǵarý. Qazirgi tańda barlyq daıyndyq jumystary aıaqtaldy. Basty rólge eki úmitker bar. Olardyń ekeýi de tanymal halyq ártisteri. Qazirgi tańda biz Buqar jyraýdyń jas kezin somdaıtyn akterdy izdestirip jatyrmyz», - deıdi Jánibek Sadyqanov.
Fılmniń túsirilimine «Arman films» kınostýdııasymen birge «Saryarqa» oblystyq telearnasy kiriskeli otyr. Túsirilim jumystary eki aıdyń kóleminde Ulytaý men shet aýdandarynda júrgiziletin bolady. Fılmniń tusaýkeseri qyrkúıek aıynda ótedi.
Fılmdi qolǵa alǵandardyń aıtýynsha, osy ýaqytqa deıin Qazaqstanda Buqar jyraý týraly fılm túsirilmegen.
