Qaraǵandy oblysynda borandy kúni shyǵyp ketken er adamnyń denesi tabyldy
QARAǴANDY. QazAqparat - Qaraǵandy oblysy Shet aýdany Aqjal aýylynyń mańynda boran kezinde er adam kóz jumdy. Ol keshe tústen keıin boranǵa qaramastan qystaqtan shyǵyp ketken. Búgin TJD qyzmetkerleri daladan onyń máıitin taýyp aldy, dep habarlaıdy QazAqparat tilshisi.
26 aqpanda Shet aýdany Aqjal kentiniń mańynda er adamnyń joǵalyp ketkeni týraly habarlama kelip tústi. 1961 jyly týǵan er adam 25 aqpanda kúndiz qystaýdan belgisiz baǵytta shyǵyp, oralmaǵan.
«Qaraǵandy oblysy TJD bólimsheleriniń, polıtsııa men jergilikti atqarýshy organdardyń kúshterinen turatyn izdestirý toby izdestirý-qutqarý jumystaryna kiristi. 26 aqpanda saǵat 17:15-te izdeý toby qystaqtan 5 shaqyrym jerde joǵalyp ketken adamnyń denesin tapty», - dep habarlady Qaraǵandy oblysy TJD baspasóz qyzmeti.
Oblystyń qutqarýshylary aýa raıy nasharlaǵan kezde eldi mekenderden tys jerlerge jaıaý jáne jol júrýden aýlaq bolýdy, aýa raıynyń ózgerýine sáıkes kıinýdi eskertedi.
Barlyq oqıǵalar men TJ faktileri týraly 112 nemese 8(7212)43-36-36, 43-37-37 telefondary boıynsha habarlasýǵa bolady.
