Qaraǵandy oblysynda bólim basshysy múgedekterden para alǵan
QARAǴANDY. QazAqparat - Qaraǵandy oblysy boıynsha Eńbek, áleýmettik damý jáne kóshi-qon komıteti departamentiniń №3 medıtsınalyq-áleýmettik saraptama bóliminiń basshysy anyqtama jazyp berý úshin múgedekterden 10 myńnan 200 myń teńgege deıin toǵyz ret para alǵan, dep habarlaıdy «QazAqparat» HAA tilshisi.
Túrli jaǵdaıǵa baılanysty múgedek bolǵan azamattar №3 medıtsınalyq-áleýmettik saraptama bóliminiń basshysynan zańdy jolmen anyqtama ala almaǵan, sebebi sheneýnik kedergi keltirgen. Ol múgedekterdiń ár qujatyna kúmán keltirip, qosymsha anyqtamalar alyp kelý kerek degen syltaýmen qaıtaryp jibergen.
Azamattar tek deldal - bólimniń bas mamany arqyly para berýge májbúr bolǵan, al bólim basshysy sodan keıin ǵana olardyń múgedektigin rastap, burynǵy qujattarynyń merzimin uzartyp otyrǵan.
Múgedektik týraly qujat rásimdeý úshin kelgen azamattardyń biri para berý týraly usynystan keıin, Sybaılas jemqorlyqqa qarsy is-qımyl ulttyq bıýrosy departamentine shaǵymdanǵan.
«Іs materıaldaryna sáıkes, paranyń somasy 10-200 myń teńge aralyǵynda bolǵan. Aqshany múgedek topqa jatatyn azamattar bergen», - dep habarlady Jezqazǵan qalalyq sotynda.
Sottyń úkimimen Qaraǵandy oblysy boıynsha Eńbek, áleýmettik damý jáne kóshi-qon komıteti departamentiniń №3 medıtsınalyq-áleýmettik saraptama bóliminiń basshysy QR QK-niń 366-baby boıynsha aıypty dep tanylyp, 14 mln teńge kóleminde aıyppul salynsa, deldal bolǵan bólim mamanyna 10 mln teńge aıyppul tóleý jazasy taǵaıyndalǵan.
