Qaraǵandy oblysynda bógettiń buzylý qaýpi týyndady, aýyldyń 100-den astam turǵyny qaýipsiz jerge kóshirildi

QR TJM baspasóz qyzmetiniń habarlaýynsha, Qoıbas aýylynynan 109 adam qaýipsiz jerge kóshirilse, olardyń 37-si balalar. Adamdar Sarepta aýylyndaǵy orta mektepke ornalastyryldy.

Tekserý jumystaryn júrgizgennen keıin damby ortasynyń topyraǵy sýsyǵandyǵy belgili boldy. Qutqarýshylar buzylýy múmkin aımaqqa sý qysymyn tómendetý úshin sýdyń deńgeıin arnaıy jylǵalarmen aǵyzý arqyly birshama tómendetti.

Qazirgi ýaqytta da arnaıy qazylǵan jylǵalar arqyly sýdy Qoıbas-2 sý qoımasyna jiberý jumystary jalǵasýda. Al Qoıbas-1 sý qoımasyndaǵy sý deńgeıiniń tómendeýi 10 santımetrdi quraıdy. №1 bóget topyraǵynyń tómen syrǵý dınamıkasy jiti baqylaýda. Sonymen qatar ishki ister bóliminiń qyzmetkerleri Qoıbas aýylynan qaýipsiz jerge kóshirilgen adamdardyń múlkin jiti kúzetýde.

Qaraǵandy oblysy boıynsha TJD-den málim etkendeı, bógettiń jobalyq kólemi - 1 mln. 700 tekshe metr, qazir ol 70 paıyzǵa tolyp tur.

Tótenshe jaǵdaıdy joıýǵa 57 adam men 21 tehnıka jumyldyryldy.