Qaraǵandy oblysynda bıznesti jeńil júrgizetin aımaqtar anyqtaldy

QARAǴANDY. QazAqparat -Qaraǵandy oblysynda óńirler bıznesti júrgizý jeńildigi boıynsha reıtıngtik baǵa aldy. Meje 13 ındıkatordan turady, onda ShOB damytý, qarjylyq qoldaý, jumyspen qamtý jáne ınvestıtsııalar sııaqty kórsetkishter eskeriledi. Bes aıdyń qorytyndysy boıynsha Qarajal qalasy, Ulytaý jáne Jańaarqa aýdandary úzdik úshtikke endi, dep habarlaıdy QazAqparat óńir basshysynyń resmı saıtyna silteme jasap.

Bıznes klımatty jaqsartý boıynsha sharalar onlaın rejımde ótken apparattyq keńeste talqylandy. Oblys ákimi Jeńis Qasymbek bul jumysty, ásirese qalalarda kúsheıtýdi talap etti.

- Oblystyń bıznes-ahýalyn jaqsartý árbir óńirdiń kásipkerlikti damytýǵa qosqan úlesine tikeleı baılanysty. Biz 5 aı ishinde bıznesti júrgizý jeńildigi boıynsha aımaqtardyń reıtınginiń aldyn ala qorytyndysyn shyǵardyq. Óńirler kemshilikterdi kóre alady. Birinshi jartyjyldyqtyń qorytyndysy boıynsha reıtıng shyǵarylady, - dedi kásipkerlik basqarmasynyń basshysy Tatıana Ablaeva.

Ótken jyly oblystyń shaǵyn jáne orta kásiporyndary 1,4 trln teńgeniń ónimin óndirdi. Bul kólem eki alyptyń – «ArselorMıttal Temirtaý» jáne «Qazaqmys» kásiporyndarynyń ónim shyǵarylymyna teń, dep atap ótti baıandamashy.

Shaǵyn jáne orta bıznes salasynda isin dóńgeletip júrgender sany da artty.

Tatıana Ablaeva ShOB-ty qarjylaı qoldaý týraly da aıtyp ótti. Onyń aıtýynsha, Bıznestiń jol kartasy boıynsha jyl basynan beri jalpy somasy 4,2 mlrd teńge bolatyn 99 joba qarjylandyryldy. «Eńbek» baǵdarlamasy boıynsha birinshi jartyjyldyqta 1,1 mlrd teńgege 210 shaǵyn nesıe berildi. Onyń kóp bóligin aýyl kásipkerleri aldy. «Qarapaıym zattar ekonomıkasy» baǵdarlamasy boıynsha 5,3 mlrd teńgeniń 63 jobasy maquldandy.

Bıyl oblystyń 14 óńirinde jas kásipkerlerge jergilikti bıýdjetten granttar bólindi. Jańaarqa jáne Qarqaraly aýdandarynda jobalar qarjylandyryldy.

- Sáýir aıynan bastap TJ kezinde zardap shekken kásipkerler úshin jeńildetilgen nesıe berýdiń jańa baǵdarlamasy bastaldy. Mólsherleme - 8%. Ekinshi deńgeıli bankterdiń aqparaty boıynsha, 15,8 mlrd teńgeni quraıtyn 58 joba maquldandy, - dedi basqarma basshysy.

Jeńis Qasymbek bıznesti qoldaý jáne jobalardy nesıelendirý jumystaryn jandandyrýdy tapsyrdy.

- Shaǵyn jáne orta bıznesti damytý – ákimderdiń jumys kórsetkishi. Bizdiń qalalarymyzda úlken múmkindikter bar jáne barlyq resýrstardy paıdalaný, kásipkerlik úshin qolaıly orta qurý qajet, - dep atap ótti oblys ákimi. - Daǵdarysqa qarsy sharalar aıasynda «Jumyspen qamtýdyń jol kartasy» baǵdarlamasy boıynsha buryn-sońdy bolmaǵan qarajat bólindi – 71 mlrd teńge. «Bıznestiń jol kartasy» jáne «Qarapaıym zattardyń ekonomıkasy», «Aýyl - el besigi» baǵdarlamalary boıynsha qarjylandyrý ulǵaıtyldy. Munyń bárin tıimdi paıdalaný kerek.