Qaraǵandy oblysynda bıznesti qoldaý úshin jeńildetilgen nesıeleý baǵdarlamasy iske qosyldy
QARAǴANDY. QazAqparat – Shaǵyn jáne orta bıznesti qoldaý úshin Qaraǵandy oblysynda TJ rejıminiń áreket etý kezeńinde jyldyq 8% jeńildikpen nesıe berýdiń jańa baǵdarlamasy bastaldy, dep habarlaıdy QazAqparat tilshisi.
Bul qaryzdar nysanaly maqsatsyz beriledi. Bul týraly oblys ákimdiginde selektorlyq rejımde ótken apparattyq keńes barysynda kásipkerlik basqarmasynyń basshysy Tatıana Ablaeva málimdedi.
Qazirdiń ózinde bankter maquldaǵan alǵashqy jobalar bar.
«Bul rette jeńildetilgen nesıe berý baǵdarlamasynda eshqandaı salalyq shekteýler qarastyrylmaǵan. Tipti qyzmetkerlerge jalaqy tóleýge, sharttyq mindettemelerdi oryndaýǵa nesıe alýǵa bolady», - dep atap ótti Tatıana Ablaeva.
Esterińizge sala keteıik, oblysta kásipkerlerge jedel kómek kórsetý shtaby jumys isteıdi. Oǵan kásipkerler palatasy men basqarma mamandary kiredi. Kún saıyn shtabqa kelip túsken 250-ge deıin qońyraý óńdeledi, onyń ishinde oqıǵa ornyna shyǵý arqyly sheshiletin máseleler de bar. Búginde mamandar 4 myń ótinish qabyldady.
Qaraǵandy qalasynyń iri saýda ortalyqtarynyń ıeleri TJ rejımi aıaqtalǵanǵa deıin jaldaý aqysyn toqtatty. Ekinshi deńgeıli bankter bıznes ókilderine nesıe tóleý merzimin keıinge qaldyrýǵa daıyn.
Tatıana Ablaevanyń aıtýynsha, jumys istemeı qalǵan kásipkerler men olardyń qyzmetkerleri 42 500 teńge kóleminde áleýmettik tólemder alý úshin ótinish jasaýda.
