Qaraǵandy oblysynda bıznes-ıdeıalardy iske asyrýǵa granttar kimderge beriledi
Konkýrsqa 29 jasqa deıingi jastar, az qamtylǵan otbasy músheleri, ataýly áleýmettik kómek alýshylar, kópbalaly azamattar, qandastar, múgedek bala tárbıelep otyrǵan adamdar jáne múmkindigi shekteýli jandar qatysa alady.
Kásipkerlikti damytýdyń 2021-2025 jyldarǵa arnalǵan ulttyq jobasy boıynsha memlekettik grant alý úshin Jumyspen qamtý ortalyǵynda jumyssyz nemese jeke kásipker retinde tirkelip, kásipkerlik negizderi boıynsha «Bastaý Bıznes» kýrsynan ótý qajet.
«Buǵan deıin bul granttar «Eńbek» memlekettik baǵdarlamasy boıynsha beriletin. Ótken jyly ol baǵdarlama aıaqtaldy. Biraq memleketten tegin grant alý múmkindigi qaldy. Sonymen qatar, bıyl grant somasy 400 AEK-ke deıin ulǵaıdy, bul 1 225 200 teńgeni quraıdy», - dep atap ótti Buqar jyraý aýdandyq jumyspen qamtý jáne áleýmettik baǵdarlamalar bóliminiń basshysy Gúljan Ábjanova.
Grant alý úshin úmitker Enbek.kz elektrondyq eńbek bırjasyna kiretin «Bıznes Eńbek» portalynda tirkelý arqyly ótinish bere alady. Nemese keńes alý úshin Jumyspen qamtý ortalyqtaryna júginý qajet.
Botaqara kentinde turatyn Almagúl Asqarova ótken jyly 530 myń teńgege grant aldy. Ol bilimi boıynsha zańger, biraq árqashan óz isimen aınalysýdy armandaǵan.
«Men «Bastaý Bıznes» mektebinde oqyp, grant jeńip alyp, úıde pıtstserııa ashtym. Barlyq qajetti jabdyqtardy, tońazytqyshtardy satyp aldym. Qazir meniń klıentterim kóp, kúnine 30-dan 50-ge deıin pıtstsa daıyndaımyz. Kent turǵyndary da, jaqyn mańdaǵy eldi mekender de, túrli uıymdar da tapsyrys beredi. Bolashaqta óz bıznesimdi keńeıtip, kafe ashqym keledi. Qazir biz jetkizý arqyly jumys istep jatyrmyz», - dedi Almagúl Asqarova.
Kópbalaly ana jáne úshinshi toptaǵy múgedek Almagúl Shaǵdabaı 2020 jyly 555 myń teńgege grant alyp, sút óńdeý tsehyn ashty. Jazda aptasyna ol shamamen 50 lıtr qaımaq shaıqaıdy, 70 kelige deıin súzbe men basqa da ónimder daıyndaıdy.
«Men Botakarda turamyn. Bizdiń otbasymyz ómir boıy mal ósirdi. Qazir 15 saýyn sıyrym bar. Sútten súzbe, aıran, qurt, maı, irimshik daıyndaımyn. 10-ǵa jýyq ónim jasaımyn, aýylda turaqty klıentterim bar. Sondaı-aq, óz ónimimdi Qaraǵandyda satamyn. Memleket kópbalaly analarǵa óz bıznesin damytýǵa múmkindik beretini jaqsy», – dep atap ótti Almagúl.
Sondaı-aq óńirde kásipkerlikti damytýdyń ulttyq jobasy aıasynda «Alǵashqy jumys orny», «Kúmis jas», «Urpaqtar kelisimsharty» jobalary iske asyrylýda. Olarǵa qatysýshylarǵa eńbekaqyny memleket sýbsıdııalaıdy.
Botaqara kentinde alǵashqy «Urpaqtar kelisimsharty» jobasyn Tatıana Smaılova paıdalandy.
«Dıplomdy ótken jyly aldym. 23 jastamyn, orys tili jáne ory ádebıetinen sabaq beremin. Birden halyqty Jumyspen qamtý ortalyǵyna júgindim. Maǵan «Urpaqtar kelisimsharty» jobasyna qatysýdy usynyp, ıÝ.Gagarın atyndaǵy mektepke jiberdi. Meniń tálimgerim – Balapan Rozalına. Osy jobanyń arqasynda men onyń tájirıbesinen ótip, kóp nárseni úırenip, ózimdi kórsete alamyn», – dep bólisti Tatıana Smaılova.
Úsh jańa joba aıasynda Buqar Jyraý aýdanynda bıyl 50-ge jýyq adamdy jumysqa ornalastyrý josparlanýda.
