Qaraǵandy oblysynda bıyl jazda 345 órt sóndirildi
ASTANA. QazAqparat - Keshe, 22 tamyzǵa deıin bıylǵy jazda Qaraǵandy oblysynyń aýmaǵynda 345 órt sóndirildi, dep habarlaıdy oblys ákimdiginiń resmı saıty .
Bıylǵy jaz asa aptapty bolyp, kúnniń ystyǵy 48 gradýsqa deıin kóterildi, bul ótken jylmen salystyrǵanda (2016 j - 26,5 gradýs) 1,8 ese joǵary. Jaýyn-shashyn da byltyrǵy mólsherden 3 ese az tústi.
20 tamyzda Amangeldi selolyq okrýginde qurǵap turǵan shóp janyp, 41 g jer qara kúıege aınaldy. Dál sol kúni Jangeldi selolyq okrýginde 45 g jer janyp ketti. Al 22 tamyzda Aqtas aýylynan 35 shaqyrym jerde órt shyqty. Jalyn eldi mekenderde órtke qarsy qurylǵan eriktiler jasaǵynyń kúshimen sóndirildi.
Janyp jatqan jerge jetýdiń qıyndyǵy, aptapty ári qurǵaq aýa raıy, sondaı-aq, jel ekpini órt sóndirýge kóp kedergi keltirdi.
Ulytaý dalalyq alqabyndaǵy órtti sóndirýge Qaraǵandy oblysy TJD «Órt sóndirý jáne apattan qutqarý qyzmetiniń» jeke quramyndaǵy 28 adam, 4 tehnıka, sondaı-aq 79 jergilikti turǵyn men 17 tehnıka tartyldy. Ortaq kúshpen qyzyl jalyn aýyzdyqtaldy.
Qaraǵandy oblystyq tótenshe jaǵdaılar departamenti oblys turǵyndaryna órt qaýipsizdigi sharalaryn saqtaýdy eskertedi.
