Qaraǵandy oblysynda bıyl qansha iri qara satyp alyndy

QARAǴANDY. QazAqparat – Qaraǵandy oblysynda bıyl asyl tuqymdy 6 reprodýktor men 4 jańa mal sharýashylyǵy keshenin ashý josparlanǵan. Bul óz kezeginde et pen sút óndirisin arttyrýǵa múmkindik beredi, dep habarlaıdy QazAqparat tilshisi.

Apparat keńesinde mal sharýashylyǵy salasyn damytýǵa qatysty Aýyl sharýashylyǵy basqarmasynyń basshysy Asqar Sanaýbarov baıandady.

Málimetinshe, óńirde tórt aıda 94,4 myń tonna sút, 26,3 myń tonna et, 221 mln dana jumyrtqa óndirilgen.

Asqar Sanaýbarov fermerlik sharýashylyqtarda mal, onyń ishinde asyl tuqymdy mal sany artyp kele jatqanyn atap ótti. Buǵan Agro nesıe korporatsııasy arqyly kórsetiletin memlekettik qoldaý yqpal etedi. Bıyl 1742 bas iri qara jáne 2316 jylqy satyp alyndy.

«Tuqymdyq túrlendirý, selektsııany yntalandyrý jolymen asyl tuqymdy mal basynyń úles salmaǵyn arttyrý boıynsha jumys jalǵasyp jatyr. 2026 jylǵa deıin mal sharýashylyǵy salasynda 1350 jumys ornyn qurýmen 43 ınvestıtsııalyq jobany iske asyrý josparlanyp otyr. Bıyl onyń 10-y iske asyrylýda: alty asyl tuqymdy reprodýktor jáne tórt mal sharýashylyǵy kesheni qurylady. Budan basqa, aýyl sharýashylyǵy jobalary áleýmettik-kásipkerlik korporatsııa arqyly qarjylandyrylatyn bolady, osyndaı tetik boıynsha eki taýarlyq-sút fermasyn salý josparlanǵan», – dedi Asqar Sanaýbarov.

Ol sondaı-aq aldaǵy ýaqytta mal azyǵyn jınaý týraly aıtty. Óńirdegi mal sharýashylyq salasyn 1,9 mln tonna shóppen qamtamasyz etý qajet. Sonymen qatar, oblysta jemshóp daqyldarynyń alqaby kóbeıdi.