Qaraǵandy oblysynda bıyl egis alqaby ulǵaıtyldy
QARAǴANDY. QazAqparat – Qaraǵandy oblysynda dándi daqyldar, kartop jáne kókónister kóbirek ósirile bastaıdy. Bıylǵy jyly egis jumystary 2020 jylǵy deńgeıge qaraǵanda 40 myń gektarǵa kóbeıtildi, ıaǵnı 1057,7 myń ga aýmaqqa egiledi dep josparlanyp otyr, dep habarlaıdy QazAqparat tilshisi.
Kóktemgi egis naýqanyna daıyndyq barysy onlaın rejımde ótken apparattyq keńeste talqylandy.
«2021 jyly aýyl sharýashylyǵy daqyldarynyń jazdyq egistigi 1057,7 myń ga quraıdy, bul ótken jylmen salystyrǵanda 40 myń gektarǵa artyq. Dándi jáne dándi-burshaqty daqyldar 940 myń ga alańda, ıaǵnı 2020 jylǵy deńgeıden 22,6 myń ga artyq, maıly daqyldar - 34,5 myń ga (+10,1 myń ga), jemshóp daqyldary - 70,6 myń ga (+6,9 myń ga) ornalastyrylatyn bolady», - dep habarlady Aýyl sharýashylyq basqarmasynyń basshysy Asqar Sanaýbarov.
Baıandamashynyń aıtýynsha, 11 myń gektarǵa kartop, 1,8 myń gektarǵa kókónis otyrǵyzý josparlanǵan.
Jınalysta málimdelgendeı, kóktemgi egiske qajetti sapaly tuqym jetkilikti túrde daıyndaldy. Mıneraldy tyńaıtqyshtardy paıdalaný ulǵaıtylady. Zııankester jáne aramshóptermen kúresýge qarajat bólindi.
Bıylǵy jyly sýarmaly jerlerdiń kólemin 1308 gektarǵa ulǵaıtý josparlanyp otyr, bul kórsetkish jalpy aýdannyń 24,6%-yn quraıdy dep kútilýde.
Egis naýqanyna 9 500-den astam traktor, 229 egis kesheni jáne 5 556 tuqym sepkish jumyldyrylady. Óńirdiń aýyl sharýashylyq kásiporyndary tehnıkany jańartýda. Jyl basynan beri jalpy somasy 1,7 mlrd teńgege 57 traktor, 12 topyraq óńdeý agregaty jáne 13 egis kesheni satyp alyndy.
Agrarshylar 19 myń tonna arzandatylǵan dızel otynyn alady.
Aýyl sharýashylyq basqarmasynyń málimetinshe, ósimdik sharýashylyǵy salasyn sýbsıdııalaýǵa bıyl 2,7 mlrd teńge qarastyrylǵan.
«Azyq-túlik qaýipsizdigin qamtamasyz etý – bizdiń basty mindetterimizdiń biri. Biz kóktemgi dala jumystaryn ońtaıly merzimde júrgizý úshin barlyq jaǵdaıdy jasaýymyz kerek. Agrotehnologııalardy paıdalaný, memlekettik qoldaý sharalaryn usyný, arzandatylǵan dızel otynyn jetkizý erekshe nazarda», - dep atap ótti oblys ákimi Jeńis Qasymbek.
Qaraǵandy aýylsharýashylyq tájirıbe stantsııasynyń mamandary Ortalyq Qazaqstan jaǵdaıynda egýdiń ońtaıly merzimderin belgiledi. Usynymdar boıynsha jumystardy aýmaqtyq aımaqtarǵa baılanysty 10 mamyrdan 28 mamyrǵa deıin júrgizý josparlanýda.
