Qaraǵandy oblysynda bıyl barlyq ınternattar jóndeledi
QARAǴANDY. QazAqparat - Qaraǵandy oblysynyń ákimi Erlan Qoshanov 2018-shi jyly mektep janyndaǵy barlyq ınternattardyń problemalaryn tolyq sheshýdi tapsyrdy, dep habarlaıdy óńir basshysynyń resmı saıty.
Aımaqta qazirgi tańda 21 osyndaı mekeme jumys isteıdi. Jóndeýge qajet qarajat oblystyq bıýdjetten bólinedi, al materıaldyq-tehnıkalyq bazany jaqsartý jergilikti bıýdjetten qarastyrylatyn bolady.
- Oblystyń 2 178 mektep jasyndaǵy balalary bar 113 eldi mekeninde mektep joq. Oǵan qosa, sońǵy jyldary az qamtylǵan mektepterdi jeli normatıvterine sáıkes kelmegendikten jabý úrdisi kózdelýde. Bul jaǵdaıda mektep janyndaǵy ınternattar erekshe mańyzǵa ıe bolady, - dedi apparattyq jınalys barysynda oblystyq Bilim basqarmasynyń jetekshisi Esenǵazy Imanǵalıev. - Búgingi tańda oblysta jobalyq qýattylyǵy 1 429 orynǵa shaqtalǵan 21 mektep janyndaǵy ınternat jumys isteıdi. Іs júzinde olarda 935 bala turady (qýattylyqtyń 65%).
Memleket úshin balalardy az qamtylǵan mektepterde oqytqannan góri ınternattarda asyrap bilim berý tıimdirek. Bilim anaǵurlym sapaly bolǵan jaǵdaıda shyǵyndar eki ese qysqarady.
Saraptamalardyń nátıjesinde mektep janyndaǵy ınternattardyń jaǵdaıyna qatysty birqatar problemalar anyqtalǵan. Ǵımarattar jóndeýdi qajet etedi. Oǵan qosa kompıýterlik parkti jańartyp, tolyqtyrý qajet, beıne baqylaý kameralaryn ornatý kerek, ashanalar men kir jýatyn bólmelerdiń jabdyqtaryn jaqsartý qajet. Keıbir ınternattarda oqýshylardy jetkizetin avtobýstar joq.
- 10 ınternat oǵan beıimdelgen ǵımarattarda ornalastyrylǵan. Sońǵy 15 jylda kúrdeli jóndeý tek bir ınternatta jasalǵan - Qarqaraly aýdanynyń Egindibulaq aýylynda. 14 ınternatta 325 mln teńgege aǵymdaǵy jóndeý jumystary jasalǵan. 6 ınternatta jóndeý júrgizilgen joq, - dep málimdedi Esenǵazy Imanǵalıev.
7 ınternattyń shatyry jóndeýdi qajet etedi, toǵyzynyń tereze bloktaryn jáne esikterin aýystyrý kerek. Onyń barlyǵyna 190 mln teńge qajet.
Óńirde taǵy alty mektep janyndaǵy ınternattardyń ashylýy josparlanyp otyr. Olardyń tórteýi jańadan salynady - Buqar Jyraý, Aqtoǵaı, Nura jáne Ulytaý aýdandarynda. Olardyń jalpy qýattylyǵy 400 oryndy quraıdy. Shet aýdanynyń Aqjal kentinde jáne Osakarov aýdanynyń Molodejnyı eldi mekeninde bar ǵımarattarda jóndeý júrgizip, ınternat qurý múmkindikteri bar.
Esep boıynsha, mektep janyndaǵy ınternattardyń materıaldy-tehnıkalyq bazasyn nyǵaıtýǵa 89,9 mln teńge, ǵımarattardy jóndeýge - 609,1 mln teńge, qurylysqa - 1,1 mlrd teńge qajet.
- Mektep janyndaǵy ınternattardyń barlyq máselelerin júıeli túrde sheshý qajet. Biz 2018-shi jylǵa oblystyq bıýdjetten 4,5 mlrd teńgeni bilim nysandarynyń jóndeýine bólemiz. Onyń ishinde barlyq mektep janyndaǵy ınternattardy jóndeý kerek - bul máseleni jabý kerek. Al jabdyqtaý, kompıýterleý, basqasynyń barlyǵyn - aýdan ákimderine jergilikti bıýdjetten qamtamasyz etýdi tapsyramyn, - dep qorytyndylady Erlan Qoshanov.
