Qaraǵandy oblysynda bıyl 75 aýyldyń ákimi saılanady

QARAǴANDY. QazAqparat - Qaraǵandy oblysynda elimizdegi alǵashqy ákimderdi tikeleı saılaýǵa daıyndyq bastaldy. Óńirde 75 aýyl ákimin saılaý josparlanyp otyr. Bul - olardyń jalpy sanynyń úshten bir bóligi. 149 eldi meken turǵyndary daýys bere alady, dep habarlaıdy QazAqparat tilshisi.

Oblystyq ákimdikte OSK ókiliniń qatysýymen ótken semınar-keńeste saılaý týraly zańnamanyń jańalyqtary men saılaýdy uıymdastyrý tártibi talqylandy.

«Saılaý zańnamasynyń jańa talaptaryn eskere otyryp, alda úlken jumys kútip tur. Qaraǵandy oblysynda 201 aýyldyq deńgeıdegi ákim bar. Alǵashqy tikeleı saılaýda 75 aýyl ákimin saılaý josparlanýda. Saılaý komıssııalarynyń múshelerin oqytý qajet. Saılaýshylar tizimin sapaly ázirleý kerek. Múmkindigi shekteýli jandardyń saılaý quqyǵyn qamtamasyz etýge erekshe nazar aýdarylsyn. Sanıtarlyq-karantındik talaptardy eskere otyryp, barlyq qajetti ınfraqurylymdy daıyndaý qajet. Eń bastysy – barlyq saılaý protsesiniń ashyqtyǵyn qamtamasyz etýlerińiz kerek», – dedi oblys ákimi Jeńis Qasymbek.

Ákimder saılanatyn 149 eldi mekende 134 myń adam turady.

Oblystyq saılaý komıssııasynyń aqparaty boıynsha, aýyl ákimderiniń tikeleı saılaýyn ótkizýge 15 aýmaqtyq jáne 149 ýchaskelik saılaý komıssııalary jumyldyrylady.

«Qazaqstanda Memleket basshysynyń tapsyrmasy boıynsha saılaý júıesi jetildirilýde. Aýyl ákimderin tikeleı saılaý azamattarǵa ózderiniń konstıtýtsııalyq quqyqtaryn tolyq júzege asyrýǵa múmkindik beredi. Bizdiń mindetimiz – saılaýdy sapaly, durys básekelestik negizde ótkizý. Bizde saılaý komıssııalarynyń jaqsy materıaldyq-tehnıkalyq bazasy qurylǵan. Jańa zańnama boıynsha saılaýdy uıymdastyrý men ótkizýdiń birqatar erekshelikteri bar. Sondyqtan biz búgin semınar-keńes ótkizemiz. Odan ári ýchaskelik jáne aýmaqtyq saılaý komıssııalarynyń músheleri oqýdan ótedi», – dep atap ótti oblystyq saılaý komıssııasynyń tóraǵasy Erqara Aımaǵambetov.

Kezdesýge qatysýshylar óz suraqtaryn qoıdy. Olarǵa OSK múshesi Anastasııa Şegortsova jaýap berdi.

Esterińizge sala keteıik, Qazaqstan Prezıdenti 2020 jylǵy 1 qyrkúıektegi halyqqa Joldaýynda aýyl ákimderin tikeleı saılaýdy engizý qajettigi týraly aıtqan bolatyn.

Qazir aýdandyq mańyzy bar qalalardyń, aýyldardyń, kentterdiń, aýyldyq okrýgterdiń basshylary janama ádispen saılanady: tańdaýshylar jergilikti máslıhattardyń depýtattary bolyp tabylady.

Qasym-Jomart Toqaev 2021 jylǵy 25 mamyrda «Qazaqstandaǵy saılaý týraly» Konstıtýtsııalyq zańǵa túzetýlerge qol qoıdy.

Qaraǵandy oblysynda alǵash ret pılottyq rejımde 2001 jyly Nura aýdanynyń Shahterskoe aýyly men Osakarov aýdanynyń Sadovoe aýyldyq okrýgi ákimderiniń janama saılaýy ótti.

2006 jyly janama ádispen Prıozersk, Sátbaev, Temirtaý qalalarynyń, sondaı-aq Aqtoǵaı, Qarqaraly jáne Nura aýdandarynyń ákimderi saılandy.

2013 jyldyń tamyz aıynda oblys boıynsha aýyldyq deńgeıdegi ákimderdi saılaý ótti. Sol kezden bastap 593 okrýg boıynsha 24 ret aýyl ákimderi saılandy.