Qaraǵandy oblysynda bıyl 7 myńnan astam bala jazǵy lagerde demalady
1 maýsymnan bastap Qaraǵandy oblysynyń 172 myń oqýshysy úshin demalys bastalady. Oblys ákimdigindegi apparattyq keńeste óńir ákimi Ermaǵanbet Bólekpaev jazǵy demalys kezinde kámeletke tolmaǵandardyń qaýipsizdigin baqylaýdy kúsheıtýdi tapsyrdy.
«Balalar jazda ashyq aýada kóp ýaqyt ótkizedi. Olarǵa barynsha qaýipsiz jaǵdaılardy qamtamasyz etý qajet. Joldardaǵy, sý aıdyndaryndaǵy qaýipsizdik máselesine erekshe nazar aýdarý qajet. Múmkindiginshe kóp balalardy mádenı-buqaralyq is-sharalarǵa tartý, olardy úıirmeler men sektsııalarǵa jumyldyrý, kámeletke tolmaǵandardyń qaýipsizdigi týraly ata-analarmen áńgime júrgizý kerek», – dedi Ermaǵanbet Bólekpaev.
1 maýsymnan bastap 172 myń oqýshy úshin demalys bastalady. Onyń 7 myńnan astamy – 11-synyp túlekteri. Jazǵy demalyspen jáne jumyspen 150 myńǵa jýyq kámeletke tolmaǵandar qamtamasyz etiledi. Onyń ishinde 7 myńnan astamy qala syrtyndaǵy saýyqtyrý lagerlerine jiberiledi, aýyl mektepterinen 500 oqýshy «Qazaqstan halqyna» qorynyń qarajaty esebinen demalady.
Sondaı-aq, óńirde 5 maýsymnan bastap mektep janyndaǵy lagerler ashylady. Oblysta alǵash ret olar erekshe bilim berý qajettilikteri bar 360 balaǵa arnalǵan arnaıy mektep-ınternattar bazasynda jumys isteıtin bolady.
Sonymen qatar, maýsym aıynda óńirde «Qaýipsiz jaz», «Qaýipsiz attraktsıon», «Qaýipsiz lager», «Qaýipsiz alań» aýqymdy profılaktıkalyq aktsııalary ótedi.
