Qaraǵandy oblysynda bıyl 630 myń sharshy metr turǵyn úı paıdalanýǵa beriledi - ákim
QARAǴANDY. QazAqparat – Qaraǵandy oblysynda bıyl 630 myń sharshy metr turǵyn úı paıdalanýǵa beriledi. Bul týraly Qaraǵandy oblysynyń ákimi Jeńis Qasymbek óziniń Facebook-paraqshasynda jazdy, dep habarlaıdy QazAqparat.
Oblys ákiminiń aıtýynsha, qazirgi tańdaǵy mańyzdy mindetterdiń biri qoljetimdi jáne sapaly turǵyn úı salý. 2019 jyly 421 myń sharshy metr turǵyn úı paıdalanýǵa berildi. Bıyl taǵy 630 myń sharshy metr turǵyn úıdi paıdalanýǵa berý josparlanǵan.
«Bul oblystyń 3 myńnan astam otbasynyń baspana máselesin sheshýine múmkindik beredi. Jańa turǵyn úı qurylysynyń qarqyny qurylys materıaldaryn óndirýshilerdiń jergilikti naryǵyn jandandyrady. Turǵyn úılerdi salý kezinde otandyq ónimderge basymdyq beriledi. Bul óz kezeginde jańa jumys oryndaryn qurýǵa múmkindik týǵyzady. Paıdalanýǵa berilgen úılerdiń sapasynyń tıisti dárejede bolýy men olardyń ınjenerlik kommýnıkatsııalarmen qamtamasyz etilýi nazardan tys qalmaıdy»,-dep jazdy óńir basshysy.
Qazirgi ýaqytta Temirtaýda jáne «Trılıstnık» turǵyn úı kesheninde anyqtalǵan qurylys barysyndaǵy aqaýlardy merdigerler óz qarjylaryna jóndep jatyr. Sondyqtan barlyq ákimderge qurylys jumystaryn erekshe baqylaýda ustaý tapsyryldy. Oblys boıynsha aýqymdy qurylys jumystaryn júrgizý josparlanyp otyr.
«Mysaly, Balqashta 5 turǵyn úı salý jumystaryn qolǵa alamyz. Olardyń 2-ýi bıylǵy jyly paıdalanýǵa beriledi. Al Sátbaev qalasynda 5 bes qabatty turǵyn úı salynýda. Olardyń 3-ýi qazirdiń ózinde paıdalanýǵa berildi. Qalǵan 2 turǵyn úıdiń qurylysy osy jyly aıaqtalady. Sondaı-aq, Temirtaý, Jezqazǵan, Sarań, Qarqaraly qalalarynda jańa úıler salynbaq. Buǵan qosa, alǵa qoıylǵan mindetterdi oıdaǵydaı iske asyrý úshin «Báıterek» UBH fılıalymen «Nurly jer» baǵdarlamasy jáne Turǵyn úı qurylys jınaq bankimen «Baqytty Otbasy» baǵdarlamasy boıynsha, sondaı-aq «7-20-25» baǵdarlamasynyń operatorlary bolyp tabylatyn ekinshi deńgeıli banktermen belsendi jumys júrgizip jatyrmyz»,-deıdi Jeńis Qasymbek.
