Qaraǵandy oblysynda bıyl 50 myńnan astam turǵyndy jumyspen qamtý josparlanyp otyr

QARAǴANDY. QazAqparat – Qaraǵandy oblysynda bıyl jumyssyzdyqpen kúresý úshin naqty sharalar qolǵa alyndy. Olardyń arasynda qysqa merzimdi kásiptik oqytý, zeınet jasyna deıingi adamdardy jumysqa ornalastyrý jónindegi baǵdarlama, jeńildikpen nesıeleý jáne óteýsiz granttar berý sııaqty baǵdarlamalar bar.

Osyndaı jumystardyń arqasynda bıyl barlyǵy 54 myń adamdy jumyspen qamtý kózdelip otyr, dep habarlaıdy QazAqparat.

Óńirlik kommýnıkatsııalar qyzmeti platformasynda ótken brıfıngte Qaraǵandy oblysynda Nátıjeli jumyspen qamtýdy damytý týraly Jumyspen qamtýdy úılestirý jáne áleýmettik baǵdarlamalar basqarmasynyń basshysy Ásem Júnispekov jumyspen qamtý baǵytyndaǵy sharalar týraly aıtyp bergen edi.

«Jastar kásipkerligin damytý úshin bıyl jańa tetik – jyldyq 2,5% jeńildikpen nesıe berilmek. Bizdiń oblysqa 324 nesıe berýge 1,6 mlrd teńge bólindi. Eń joǵary soma – 5 jyl merzimge 5 mln teńge, al mal sharýashylyǵy salasyndaǵy jobalar úshin – 7 jylǵa deıin. Negizgi shart – kepil múlki. Qujattar men bıznes-jospar Agrarlyq nesıe korporatsııanyń fılıalyna usynylýy kerek. Nesıe berý týraly sheshimdi komıssııa qabyldaıdy. Áleýetti alýshy barlyq aqparatty turǵylyqty jeri boıynsha jumyspen qamtý ortalyqtarynan nemese Agrarlyq nesıe Korporatsııanyń saıtynan bile alady», – dep habarlady Ásem Júnispekova.

Onyń sózinshe, halyqtyń áleýmettik osal toptarynyń ókilderine bıznes-ıdeıalardy iske asyrýǵa 190-nan astam grant beriledi.

«Kúmis jas» jobasynda ózgerister bar. Endi oǵan 50 jasqa tolǵan qazaqstandyqtar qatysa alady. Buryn baǵdarlama 58 jastan asqan adamdarǵa beriletin.

Oblystaǵy jumyssyzdardy jeke kómekshi jáne áleýmettik qyzmetker mamandyqtaryna oqytý josparlanyp otyr.

«Jastar tájirıbesi», «Birinshi jumys orny» jáne «Urpaqtar kelisimsharty» jobalary boıynsha eńbekaqy mólsheri 30 AEK-ke deıin ulǵaıtyldy. Qatysý merzimi – 12 aıǵa deıin.

Jumyspen qamtý ortalyqtarynyń qyzmetkerleri aı saıyn oblystyń kásiporyndarymen jáne uıymdarymen bos oryndar jármeńkesin ótkizedi. Turǵyndarǵa jumys oryndary men júzere asyrylyp jatqan jumyspen qamtý baǵdarlamalary týraly keńes beretin mobıldi toptar jumys isteıdi.