Qaraǵandy oblysynda bıyl 4000-nan astam páter salynady
QARAǴANDY. QazAqparat - Bıyl oblysta "Nurly jer" baǵdarlamasy boıynsha 4 300 páterge shaqtalǵan 420 myń sharshy metr turǵyn úı salý josparlanyp otyr. Ol jaıly Qaraǵandy oblysy qurylys basqarmasynyń basshysy Taıhan Qalmahanov málimdedi, dep habarlaıdy QazAqparat tilshisi.
Respýblıkalyq bıýdjet esebinen aımaqta 416 jalǵa beriletin páter salynady. Onyń 228-i Saran, Temirtaý, Prıozersk qalalary jáne Buqar Jyraý, Shet jáne Aqtoǵaı aýdandarynda qoldanysqa beriledi.
Sondaı-aq, "Nurly jer" baǵdarlamasy boıynsha Qaraǵandy oblysynda bıyl 594 nesıelik páter paıdalanýǵa beriledi.
Kóp balaly jáne az qamtylǵan otbasylar úshin Jezqazǵanda 60 páterli úı salynady. Sátpaev qalasynda - 56 páterli úı, Qarqaraly jáne Osakarov aýdanynda - 72-páterge shaqtalǵan tórt úı, Jańaarqa aýdanynda 88 páterlik jeti úı salynbaq. Abaıda 80 páterlik úı, al Buqar jyraý aýdanynda 16 páterge shaqtalǵan úı salynady. Jańa turǵyn úıler jalǵa beriletin bolady.
Oblystyq bıýdjetten az qamtylǵan jáne kóp balaly otbasylar turǵyn úı alý úshin mıllıard teńge bólindi. Olar "Turǵyn úı qurylys jınaq bankiniń" jeńildetilgen baǵdarlamasy boıynsha ekinshi naryqta páter satyp alýǵa jylyna 2% nesıe alý múmkindigine ıe bolady.
"7-20-25" baǵdarlamasy boıynsha Jezqazǵan, Qaraǵandy jáne Sátpaev qalalarynda 1052 páter salynady. Atalmysh baǵdarlama boıynsha bıýdjettik sala qyzmetkerlerine turǵyn úı sertıfıkattary beriledi. Bul úshin oblystyq bıýdjetten bir mıllıard teńge qarastyrylǵan.
2019 jyldyń alǵashqy eki aıynda oblysta 729 páter paıdalanýǵa berildi.
