Qaraǵandy oblysynda bıyl 20 myńnan astam oqýshy birinshi synypqa barady
Jańa oqý jylynyń erekshelikteri týraly Óńirlik kommýnıkatsııalar qyzmetinde ótken brıfıngide Bilim basqarmasynyń basshysy Gúlsim Qojahmetova aıtyp berdi.
«Epıdemıologııalyq jaǵdaıǵa baılanysty saltanatty jıyndar tek birinshi synyp oqýshylary úshin ótedi. Balalarǵa 1 qyrkúıekte Ahmet Baıtursynovtyń ádistemesi negizinde ázirlengen «Álippe» jáne «Býkvar» tabys etiledi. Sondaı-aq, bul kúni barlyq mektepterde «Táýelsizdik jetistikteri» taqyrybynda synyp saǵattary ótedi», – dedi Gúlsim Qojahmetova.
Bıyldan bastap 5-8 synyp oqýshylary úshin tańdaýy boıynsha jańa kýrstar engiziledi: «Parasattylyq jáne etıka», «Ekologııa», «Emotsııalyq aqyl-oı jáne synı oılaý», «Medıasaýat».
Mektep formasy mindetti emes. Klassıkalyq jáne iskerlik stıldegi kıimge ruqsat etiledi.
Spıkerdiń aıtýynsha, jalpyǵa mindetti oqý qory esebinen áleýmettik osal otbasylardan shyqqan 22 myńnan astam oqýshy mektep formasymen jáne kerek-jaraqtarmen qamtamasyz etiledi. 16 myńnan astam oqýshyǵa tegin túski as beriledi. Bıýdjetten barlyq bastaýysh synyp oqýshysyn tegin ystyq tamaqpen qamtamasyz etýge qarajat bólindi.
«Mektepke jol» respýblıkalyq qaıyrymdylyq aktsııasy aıasynda áleýmettik qoldaýǵa muqtaj 3 899 balaǵa kómek kórsetildi, dep tolyqtyrdy basqarma basshysy.
Kolledjder de dástúrli formatqa oralady. Oqý-óndiristik sheberhana men zerthana jumysyn qaıta bastaıdy. Stýdentter jataqhanaǵa ornalasady.
«Barlyq bilim berý uıymdary Ashyq jobasynyń qatysady. Barlyq sanıtarııa talaptary oryndaldy. Oqý bastalǵanda kabınettik júıe alynyp tastalady jáne túrli synyptar úshin úzilis ártúrli ýaqytqa bólinedi. Sabaqtar birneshe aýysymmen ótedi», – dep atap ótti Gúlsim Qojahmetova.
Vedomstvonyń málimetinshe, búgingi tańda oqý oryndary qyzmetkerleriniń 90%-dan astamy koronavırýs vaktsınasyn alǵan.
Oqýdy uıymdastyrý jónindegi suraqty bilim basqarmasynyń jedel jelisine: (8-7212) 25-25-02 jáne 8 747 491 1291, sondaı-aq Telegram (@karbilimbaskarma) paraqshasyna júginýge bolady.
