Qaraǵandy oblysynda bıyl 13 aýyl men kenttiń ákimi saılanady

QARAǴANDY. QazAqparat – Qaraǵandy oblysynda 13 ákimniń laýazymyna 40 kandıdat tirkelgen. Qazir olar úgit júrgizip jatyr. Saılaý 10 sáýirde segiz aýyldyq aýdanda, sondaı-aq Jezqazǵan qalasynyń Keńgir kentinde jáne aýdandyq mańyzy bar Abaı qalasynda ótedi, dep habarlaıdy QazAqparat tilshisi.

Saılaý aldyndaǵy naýqan barysy týraly oblys ákimdiginde apparattyq keńeste aıtyldy.

«2021 jyldan bastap aýdandyq mańyzy bar qalalardyń, aýyldyq okrýgterdiń, aýyldar men kentterdiń ákimderin tikeleı saılaý engizildi. Ótken jyly Qaraǵandy oblysynda 89 aýyl ákimi saılandy. Biz búgin olardyń belsendi jáne syndarly jumysyn kórip otyrmyz. Olar óńirlerdiń damýyna jańa serpin berdi. Qazir saılaý naýqany 13 okrýgte júrip jatyr. Aýyldyq okrýgter, aýyldar men kentter, sondaı-aq aýdandyq mańyzy bar Abaı qalasynyń ákimderin saılaý ótedi», – dedi oblys ákimi Jeńis Qasymbek.

Qaraǵandy oblystyq saılaý komıssııasy tóraǵasynyń orynbasary Mádına Apıevanyń aqparaty boıynsha, ákim laýazymyna 45 kandıdat usynylyp, onyń 40-y tirkeldi.

«Saılaýǵa 10 aýmaqtyq, 43 ýchaskelik saılaý komıssııalary qatysady. Saılaý komıssııalarynyń 325 múshesi jumyldyrylady. Saılaýshylar tizimin naqtylaý boıynsha jumystar júrgizilýde», – dedi Mádına Apıeva.

Jeńis Qasymbek aýdandar men Jezqazǵan qalasynyń ákimderine daýys berý pýnktterinde qajetti materıaldyq-tehnıkalyq jáne sanıtarlyq jaǵdaılardy qamtamasyz etýdi tapsyrdy. Polıtsııa saılaý ýchaskelerin kúzetýdi jáne qoǵamdyq tártiptiń saqtalýyn qamtamasyz etýi tıis.

Onynshy sáýirde kelesi ákimderdi saılaý ótedi:

- Jezqazǵan qalasynyń Keńgir kenti;

- Abaı qalasy;

- Abaı aýdanynyń Esenkeldi jáne Qurma aýyldyq okrýgteri;

- Aqtoǵaı aýdany Shabanbaı aýyldyq okrýgi;

- Buqar Jyraý aýdany Kókpekti aýyldyq okrýginiń Aqtóre aýyly;

- Jańaarqa aýdany Taldybulaq aýyldyq okrýgi;

- Qarqaraly aýdany Temirshi aýyldyq okrýgi;

- Nura aýdanynyń Qulanótpes aýyly;

- Osakarov aýdanynyń Qaraǵaıly jáne Pıoner aýyldyq okrýgteri;

- Ulytaý aýdany Qarsaqpaı kenti.