Qaraǵandy oblysynda bıyl 1 myń shaqyrym jol jóndeledi

QARAǴANDY. QazAqparat - Qaraǵandy oblysynda 1 000 shaqyrymnan astam jol retke keltirilýde, dep habarlaıdy QazAqparat tilshisi.

Bıyl óńirdiń qalalary men aýdandaryndaǵy oblystyq jáne respýblıkalyq mańyzy bar avtojoldar jóndeletin bolady. Al, oblys ákimi Erlan Qoshanov jol tóseminiń sapasyn baqylaýdy kúsheıtýdi tapsyrdy.

«Asfalt tóseý barysynda sapany baqylaý úshin jurtshylyqty, depýtattardy tartyńyzdar. Qatań baqylaýsyz aqshanyń barlyǵy jelge ketkendeı bolady», - dep atap ótti oblys ákimi.

Aıta ketý kerek, jol sapasyn da endi jańa vedomstvo - jol aktıvteri sapasynyń ulttyq ortalyǵy qadaǵalaıtyn bolady. Uıymnyń quramynda 25 adam qyzmet etedi. Mamandar kún saıyn asfalt tóseıtin ýchaskelerge baryp, materıal synamasyn alyp, tehnologııalyq normalardyń saqtalýyn qadaǵalaıtyn bolady.

Bıyl oblys ortalyǵynda Respýblıka dańǵyly men Táttimbet kóshesin jalǵaıtyn jol qurylysy aıaqtalýǵa tıis. Taǵy eki jańa joldyń qurylysy bastalady, olardyń biri aınalma, al ekinshisi salynyp jatqan kóterme-taratý logıstıkalyq ortalyǵyna aparatyn joldar. Osynyń barlyǵy qala joldaryn júk kólikterinen bosatýǵa múmkindik beredi.

Novodolınka-Shahan, Qarabas-Jartas-Dolınka jáne Aqtoǵaı-Balqash joldarynda kúrdeli jóndeý jumystary jalǵasýda. Sondaı-aq, bıylǵy jyly Qaraǵandy qalasynan Saran jáne Shahtınsk qalasyna baratyn tas joldarda kúrdeli jóndeý jumystary bastalady.

Sý tasqynyna qarsy sharalar aıasynda tórt kópir men 12 sý ótkizý qubyryn jóndeý josparlanýda. Qaraǵandy-Toǵyzqudyq-Botaqara tas jolyndaǵy sý ótkizý qubyryn kúrdeli jóndeý shilde aıynda aıaqtalady.

Qaraǵandy qalasynyń ákimi Nurlan Áýbákirovtiń aıtýynsha, 25 sáýirden keıin Fedorov, Ýzenka jáne Maıqudyq shaǵyn aýdandaryndaǵy oramaralyq joldardy jóndeý bastalady. Buqar jyraý dańǵylynda jol ótpesinen Goncharnaıa kóshesine deıingi jáne Saran tas jolynda 15 magıstraldan DSK deıingi jolda ortasha jóndeý jumystary qarastyrylǵan.

Qala basshysynyń aqparaty boıynsha, shuńqyrlardy jóndeý jumystary 25 myń sharshy metr jol tósemin qamtıdy, bul jumystar jazdyń basynda aıaqtalýy tıis.

Oblys ortalyǵynda jaramsyz bolyp qalǵan joldardyń kepildi merzimi aıasynda jóndeýge keler bolsaq, merdigerlerge aqaýdy 25 mamyrǵa deıin joıý mindetteldi.