Qaraǵandy oblysynda birqatar avtojol jańartylýda
QARAǴANDY. QazAqparat - Qaraǵandy oblysynda respýblıkalyq mańyzy bar joldardy kúrdeli jóndeý jumystary jalǵasýda, dep xabarlaıdy QazAqparat tilshisi.
Jóndeý jumystary 2013 jyly bastalǵan. Sol kezde elordadan Qaraǵandy, odan keıin Balqash jáne Almatyǵa deıingi joldardy kúrdeli jóndeýden ótkizý týraly sheshim qabyldandy. Joldardyń jalpy uzyndyǵy - 662 shaqyrym.
Qazir Qaraǵandy-Temirtaý tas jolynyń 15 shaqyrymyn jóndeý jumystary qyzý júrip jatyr. Munda negizgi jumystarmen qatar, beton tósemindegi aqaýlar joıylýda.
Qaraǵandy mańynda salynyp jatqan aınalma jolda qazir 600 birlik tehnıka men myńnan astam adam jumys isteıdi. Qazirgi ýaqytta olar qıyrshyq tas-mastıkalyq asfalt-betonnyń joǵarǵy qabatyn tósep, kólik aıryqtaryn salýda. Atalmysh jol boıynda qozǵalysty osy jyldyń sońyna deıin ashý josparlanýda.
Bıylǵy jyldyń sáýir aıynda Qaraǵandy-Balqash tas jolynda jóndeý jumystary bastaldy. 2022 jyly bul bóliktegi jóndeý jumystary aıaqtalady dep josparlanýda. Balqash qalasynan Almatyǵa qaraı uzyndyǵy 143 km trassa ýchaskesinde jumystardyń belsendi kezeńi kelesi aıda bastalady.
Jergilikti mańyzy bar avtojoldarǵa keletin bolsaq, uzyndyǵy 17 shaqyrymdy quraıtyn «Novodolınka-Shahan-Molodetskoe» trassasyn qaıta jańartý jalǵasýda.
Oblys ákiminiń tapsyrmasy boıynsha «Qaraǵandy-Saran-Shahtınsk» avtojolynda uzyndyǵy 19 shaqyrym kúrdeli jóndeý jumystary bastaldy.
Sonymen qatar, Elbasynyń 2018 jylǵy 10 qańtardaǵy Qazaqstan halqyna Joldaýyn iske asyrý sheńberinde jáne óńirishilik mobıldilikti jaqsartý úshin oblystaǵy 60-tan astam eldi mekendi qamtıtyn jergilikti mańyzy bar avtojoldardyń 19 ýchaskesinde ortasha jóndeý kózdelgen.
Atalǵan ınfraqurylymdyq jobalardy iske asyrý mańyzdy áleýmettik jáne ekonomıkalyq mánge ıe. Bul nysandarda 2 myńǵa jýyq jumys orny quryldy. 500-den astam birlik mashınalar men arnaıy tehnıka jumyldyryldy.
