Qaraǵandy oblysynda bir jylda myńnan astam qoqys úıindisi joıyldy
QARAǴANDY. QazAqparat – Osy jyly Qaraǵandy oblysynda ǵaryshtyq monıtorıng kómegimen 1 360 qoqys orny anyqtaldy. Jergilikti atqarýshy organdar men kommýnaldyq qyzmetterdiń kúshimen jyl ishinde onyń 1 340-y nemese jalpy sanynyń 99,3%-y joıyldy, dep habarlaıdy QazAqparat tilshisi.
Bul týraly Óńirlik kommýnıkatsııalar qyzmeti alańynda ótken brıfıngte tabıǵı resýrstar jáne tabıǵat paıdalanýdy retteý basqarmasynyń basshysy Áset Tazabekov málim etti.
Óńirde qatty turmystyq qaldyqtardy jınaý, shyǵarý jáne kómýdi barlyǵy 31 mamandandyrylǵan uıym men kásiporyn júzege asyrady. Oblys boıynsha 13 myńnan astam konteıner, onyń ishinde qaldyqtardy bólek jınaýǵa arnalǵan 1 200 jáne quramynda synaby bar quraldar úshin 66 konteıner ornatyldy. Biraq, soǵan qaramastan, mezgil-mezgil oblystyń ártúrli bólikterinde ruqsat etilmegen polıgondar paıda bolady.
«Oblysta 202 qatty turmystyq qaldyqtar polıgony bar, onyń ishinde búgingi tańda 51-de ruqsat berý qujattamasy bar. Sondaı-aq, óńirde qaldyqtardy basqarý salasynda birqatar ınvestıtsııalyq jobalar bar. Qaraǵandyda Waste-to-Energy tehnologııasy boıynsha energııa ala otyryp, qaldyqtardy energetıkalyq kádege jaratý obektisiniń, Jezqazǵan qalasynyń Keńgir kentindegi bıoelektr stantsııasynyń jáne Qaraǵandyda bıogaz elektr stantsııasynyń qurylysy belgilenip otyr», – dep habarlady Áset Tazabekov.
Sondaı-aq, oblysta shaǵyn jáne orta bıznes sýbektilerin keńinen tarta otyryp, QTQ-ny zamanaýı kádege jaratý jáne qaıta óńdeý boıynsha sharalar kesheni ázirlendi. Onda óńirdiń damý baǵdarlamasymen biriktirilgen nysanaly ındıkatorlar belgilengen.
