Qaraǵandy oblysynda bir táýliktiń ishinde 13 mas júrgizýshi jazaǵa tartyldy
QARAǴANDY. QazAqparat - Qaraǵandy oblysynyń Polıtsııa departamenti 21 qazanda bastalǵan «Qaýipsiz jol» jedel aldyn-alý is-sharasy barysynda 600-den astam jol qozǵalysy erejelerin buzý faktilerin anyqtaǵan, dep habarlaıdy QazAqparat tilshisi.
«QazAvtoJol» UK» AQ, «Kazahavtodor» JShS jáne Qaraǵandy oblysy boıynsha kóliktik baqylaý ınspektsııasynyń ókilderi birlesip, jıi jol apaty bolatyn qaýipti ýchaskelerinde qozǵalys qaýipsizdigin qamtamasyz etý boıynsha qosymsha tekserý júrgizdi.
Іs-sharanyń maqsaty júrgizýshilerdiń kólik tártibin arttyrý, jol-kólik oqıǵalarynyń sanyn azaıtý, sondaı-aq jol qozǵalysy erejelerin buzýdyń aldyn alý bolyp tabylady.
Jol qozǵalysyna qatysýshylaryna qaýipsizdik saqtaý týraly býkletter, jadynamalardy, avarııalyq-qaýipti ýchaskelerdiń kartalaryn, t. b. taratý arqyly jol qozǵalysy qaýipsizdigin nasıhattaý boıynsha túsindirý jumystary júzege asyrylady.
«Qaýipsiz jol» jedel aldyn alý is-sharasyn ótkizýdiń birinshi kúninde 629 jol qozǵalysy erejesin buzý oqıǵasy anyqtaldy. Júrgizýshiler kóbinese qaýipsizdik beldikterin paıdalaný erejelerin buzǵan (61 jaǵdaı), 46 júrgizýshi ruqsat etilgen qozǵalys jyldamdyǵynan asyp ketken jáne 36 avtokólik ıesi kólik quralyn júrgizý kezinde telefondy paıdalanǵan. Sondaı-aq, bir táýlik ishinde polıtsııa qyzmetkerleri mas kúıinde rýlge otyrǵan 13 júrgizýshini ákimshilik jaýapkershilikke tartty.
Qaraǵandy oblysynyń polıtsııa departamenti jol qozǵalysynyń barlyq qatysýshylaryn jol qozǵalysy erejelerin buzbaýǵa, jyldamdyq rejimin saqtaýǵa, júris bóliginde saq bolýǵa shaqyrady.
