Qaraǵandy oblysynda bir táýlikte 7 dala órti sóndirildi
QARAǴANDY. QazAqparat - Qaraǵandy oblysynyń Jańaarqa, Aqtoǵaı, Abaı, Qarqaraly jáne Ulytaý aýdandarynda 10-nan 45 gektarǵa deıingi alańda dala órti tirkeldi. Qaraǵandy oblysy TJ departamenti bólimsheleri, jergilikti atqarýshy organdardyń jáne erikti órtke qarsy qurylymdar órtti sóndirdi, dep habarlaıdy QazAqparat tilshisi.
Ulytaý aýdanynda iri dala órtterin sóndirý jalǵasýda. Qurǵaq shóptiń janýy 5 tamyzda Amankeldi aýyldyq okrýginde Sarlyqeldi mekeninen 33 shaqyrymda anyqtalǵan.
Aldyn ala málimet boıynsha órttiń aýmaǵy 900 gektardan asady. Órtti sóndirýge Qaraǵandy oblysy TJ departamentiniń, jergilikti atqarýshy organdardyń, órtke qarsy erikti quralymdardyń, polıtsııanyń jáne jergilikti turǵyndardan 111 adam men 22 tehnıka jumyldyrylǵan.
Qutqarýshylar óńir turǵyndaryna órt qaýipti kezeńde órt qaýipsizdigi sharalaryn qatań saqtaýdy eske salady.
«Turaqty qurǵaq jáne ystyq aýa-raıy órttiń úlken aýdandarǵa tez taralýyna yqpal etedi jáne ony toqtatý óte qıyn. Sondaı-aq, jalynmen kúresý órt sóndirý tehnıkasy jetýge qyıyn dala alqaptary, jaqyn jerde sý resýrstarynyń bolmaýy qıyndatady», - dep málimdedi TJD ókilderi.
Órt qaýipti kezeńdegi qarapaıym qaýipsizdik sharalaryn este saqtańyzdar:
- qurǵaq shópti órtemeńiz;
- alaý jaqpańyz;
- bótelkelerdi, shynynyń synyqtaryn, basqa da qoqystardy kún kózine qaldyrmańyz;
- eshqashan sóndirilmegen sirińkeni nemese temekini tastamańyz.
Eger órt oshaqtaryn tapsańyz, dereý «101» nemese «112» nómirlerine habarlańyz.
