Qaraǵandy oblysynda bir táýlikte 107 adam qar qursaýynan qutqaryldy
ASTANA. QazAqparat - Sońǵy kúnderi Qaraǵandy oblysy aýmaǵynda qatty jel men burqasyn soǵyp, kúrdeli meteorologııalyq jaǵdaı qalyptasty.
Qaraǵandy oblystyq TJD memlekettik til jáne aqparat bóliminiń habarlaýynsha, 25-26 qańtar aralyǵynda barlyq avtokólik túrleri úshin «Topar - Jezqazǵan», «Qaraǵandy - Aqsý-Aıýly», «Qaraǵandy-Qarqaraly», «Qaraǵandy - Pavlodar oblysynyń shekarasy»,»Temirtaý - Aqmola oblysynyń shekarasy» jáne «Kıevka - Aqmola oblysynyń shekarasy» avtojol bólikterindegi qozǵalys toqtatyldy.
Jekelegen azamattar qar qursaýynda qalyp qoıdy.
Qaraǵandy oblystyq TJD biryńǵaı kezekshi-dıspetcherlik qyzmetiniń basqarmasy ótken táýlikte oblys turǵyndarynan 2 myńǵa jýyq qońyraý qabyldaǵan.
Qaraǵandy oblysynyń qutqarýshylary jergilikti polıtsııa qyzmetiniń bólimshelerimen, jol uıymdarymen jáne aýdan ákimdikterimen birlesip, barlyǵy 107 adamdy qutqardy. Apatty-qutqarý jumystaryna Qaraǵandy oblystyq TJD órt sóndirý jáne apatty-qutqarý jumystary qyzmetiniń bólimsheleri men aýdandyq TJ bólimderi jumyldyryldy. 
