Qaraǵandy oblysynda bir mıllıonnan astam adam sanaqtan ótti

QARAǴANDY. QazAqparat – Ulttyq sanaqtyń aıaqtalýyna bes kún qalady. Qaraǵandy oblysynda 25 qazandaǵy jaǵdaı boıynsha saýalnamaǵa 1 mln 58 myń 936 adam qatysty, dep habarlaıdy QazAqparat tilshisi.

Bul týraly Statıstıka departamentiniń basshysy Janat Sadyqova onlaın rejımde ótken apparattyq keńeste málimdedi.

Sanaqqa qatysqandar arasynda eń belsendi Nura aýdanynyń turǵyndary boldy. Bul aýdanda naýqan merziminen buryn, júz paıyz qamtýmen aıaqtalýy múmkin. Sondaı-aq Prıozersk jáne Ulytaý aýdandary kósh bastap tur.

Esterińizge sala keteıik, sanaq.gov.kz saıtynda onlaın sanaq jalǵasýda. Saýalnamadan óz betinshe ótpegenderdi ıntervıýerler aralaıdy. Bul halyqty sanaqpen tolyq qamtý úshin qajet.

Barlyq ıntervıýer koronavırýs vaktsınasyn alǵan, sondaı-aq jeke qorǵanysh quralymen qamtamasyz etildi. Intervıýerdiń ózimen birge kýáligi bolýy tıis, onyń durystyǵyn sanaq.gov.kz saıtynda tekserýge bolady. Sonymen qatar, olarda moıynoraýysh jáne sanaqtyń sımvoly bar kók portfel berilgen.

Óńir basshysy Jeńis Qasymbek qalalar men aýdandardyń ákimderine sanaqtyń aıaqtalýyna barynsha yqpal etýdi jáne týyndaǵan máselelerdi jedel sheshýdi tapsyrdy.

Ulttyq sanaq 30 qazanda aıaqtalady. Osydan keıin, 31 qazannan 7 qarashaǵa deıin bir apta ishinde 10 paıyzdyq ishinara tekserý júrgiziledi.

Sanaqqa qatysty barlyq suraqtar boıynsha 1446 jáne 8-8000-800-878 táýlik boıǵy call-ortalyqqa habarlasýǵa bolady. Qońyraý shalý tegin. Sonymen qatar, sanaq.gov.kz saıtynda telefon nómiri bar óńirlerdiń call-ortalyqtarynyń tizimi bar.